सध्या मुंबईत मुसळधार पाऊस सुरू आहे. अनेक शाळांना देखील सुट्टी देण्यात आली आहे. अशात मुंबईच्या रस्त्यावर एक भयंकर घटना घडली आहे. 'कसौटी जिंदगी की' फेम अभिनेत्री उर्वशी ढोलकियाचा मुलगा क्षितिजच्या कारचा अपघात झाला आहे. क्षितिज ढोलकिया देखील एक अभिनेता आहे. क्षितिजच्या पार्क केलेल्या कारवर झाड पडले आहे. या घटनेत क्षितिज थोडक्यात बचावला. याची माहिती क्षितिजने सोशल मीडियावर फोटो आणि व्हिडीओ शेअर करून चाहत्यांना दिली.

व्हिडिओमध्ये एक मोठे झाड पडल्याने कारचे नुकसान झाल्याचे आणि अधिकारी ते झाड हटवण्याचे काम करत असल्याचे दिसत होते. एका व्हिडिओमध्ये क्षितिजने सांगितले, "सध्या माझ्या कारची ही अवस्था आहे. सुदैवाने, कोणालाही दुखापत झालेली नाही." तसेच क्षितिजने आपत्कालीन पथकांच्या तत्परतेबद्दल त्यांचे आभार मानले. त्याने लिहिले, "आयुष्य किती अनिश्चित असू शकते, याची ही एक भीतीदायक आठवण आहे. मी कारमध्ये नव्हतो आणि सर्वजण सुरक्षित आहेत, याबद्दल मी कृतज्ञ आहे. पोलीस आणि अग्निशमन दलाने केलेल्या तत्पर मदतीबद्दल त्यांचे खूप खूप आभार. मी सदैव ऋणी राहीन."

क्षितिज ढोलकिया कोण?

क्षितिज ढोलकियाने नुकतीच आपल्या अभिनय कारकिर्दीला सुरुवात केली असून तो 'माँ है ना' आणि 'नागिन ७' मध्ये दिसला होता. 'नागिन ७'मध्ये क्षितिज ढोलकियाने 'नाग'ची भूमिका साकारली होती. त्याने साजिद खान दिग्दर्शित 'हमशकल्स' (२०१४) मध्ये सहाय्यक म्हणून काम केले आणि त्यानंतर २०१९ मधील 'ड्रीम गर्ल' या चित्रपटासाठीही काम केले.क्षितिजची आई उर्वशी ढोलकिया ही टिव्हीचा प्रसिद्ध चेहरा आहे. उर्वशी ढोलकिया अनेक टिव्ही मालिका, रिॲलिटी शोमध्ये झळकली आहे.