Box Office Collection: मराठी चित्रपटसृष्टीत सध्या एकाच चित्रपटाची चर्चा रंगली आहे – ती म्हणजे ‘दशावतार’. या रहस्यमय थ्रिलरने केवळ प्रेक्षकांना खिळवून ठेवले नाही, तर बॉक्स ऑफिसवरही आपली पकड अधिक घट्ट केली आहे. दोन आठवड्यांचा प्रवास पूर्ण करताना या चित्रपटाने तब्बल १८.४० कोटींचा टप्पा पार केला आहे.

पहिल्या आठवड्यात सुमारे ९.२ कोटींची कमाई करून, दुसऱ्या आठवड्यात ‘दशावतार’ने विकेंडला मोठी कमाई केली आहे. दुसऱ्या शनिवारी (दिवस ९) २.६५ कोटी आणि दुसऱ्या रविवारी (दिवस १०) ३ कोटी इतकी कमाई करत या चित्रपटाने बॉक्स ऑफिसवर चांगलीच पकड कायम ठेवली. एवढेच नव्हे तर १४ व्या दिवशीही या चित्रपटाने ४० लाखांची कमाई केली. महाराष्ट्रात सरासरी १२.३१% ऑक्युपन्सी नोंदली गेली असून, विशेष म्हणजे रात्रीचे शो अधिक हाऊसफुल्ल होताना दिसत आहेत.

दरम्यान, बॉलिवूडची मोठी रिलीज ठरलेली ‘जॉली एलएलबी ३’ मात्र आपल्या पहिल्या आठवड्यानंतर गडगडताना दिसत आहे. सातव्या दिवशी या चित्रपटाने केवळ २.२७ कोटींची कमाई केली आणि त्याचे एकूण भारतातील कलेक्शन ७२.२७ कोटींवर पोहोचले. सुरुवातीला दमदार ओपनिंग केलेल्या या चित्रपटाची गती मात्र दिवसेंदिवस मंदावली असून, प्रेक्षकांच्या प्रतिसादात घट दिसून येत आहे.

बॉक्स ऑफिसवरचा हा विरोधाभासी चित्रपटांचा खेळ मराठी चित्रपटसृष्टीसाठी नवा आत्मविश्वास देणारा आहे. मर्यादित बजेट व मर्यादित स्क्रिन्सवर रिलीज होऊनही ‘दशावतार’ मोठी रिलीज पेक्षा चांगली कमाई करत आहे. आजवर ‘सैराट’ आणि ‘नटसम्राट’ सारख्या चित्रपटांनी बॉक्स ऑफिसवर मोठे विक्रम केले होते. त्याच रांगेत आता ‘दशावतार’च्या नावाची नोंद झाली आहे यात शंका नाही.