Marathi Actress Accident: ‘कपबशी’ या आगामी मराठी चित्रपटाच्या प्रमोशनदरम्यान एक अनपेक्षित घटना घडली आहे. चित्रपटाच्या मोशनसाठी पुण्यावरून सांगलीकडे जात असताना कलाकारांच्या गाडीचा अपघात झाला. सुदैवाने या अपघातात कोणतीही जीवितहानी झाली नसून गाडीतील सर्वजण सुरक्षित असल्याची माहिती समोर आली आहे.

मिळालेल्या माहितीनुसार, ‘कपबशी’ चित्रपटाच्या प्रमोशनसाठी अभिनेत्री पूजा सावंत, अभिनेता ऋषी मनोहर आणि चित्रपटाचे प्रसिद्धी प्रमुख दर्शन मुसळे हे पुण्याहून सांगलीकडे प्रवास करत होते. सातारा जिल्ह्यातील काशीळ परिसरात त्यांच्या गाडीसह तीन गाड्या एकमेकांवर आदळल्याने हा अपघात घडला. अपघातानंतर काही काळ परिसरात गोंधळाचे वातावरण निर्माण झाले होते.

या अपघातात गाडीचे नुकसान झाले असले तरी गाडीतील सर्व प्रवासी सुखरूप बचावले आहेत. काहींना किरकोळ मुका मार लागला आहे पण कोणालाही गंभीर दुखापत झालेली नाही. त्यामुळे मोठा अनर्थ टळल्याचे सांगितले जात आहे. अपघाताची माहिती मिळताच स्थानिक नागरिक आणि संबंधित यंत्रणा घटनास्थळी दाखल झाल्या. त्यांनी तातडीने मदतकार्य सुरू करत परिस्थिती नियंत्रणात आणली.