मराठी मनोरंजन विश्वातील प्रसिद्ध अभिनेत्याने करिअरमधून ब्रेक घेतल्याचा खुलासा केला आहे. हा अभिनेता दुसरा तिसरा कोणी नसून ज्येष्ठ अभिनेते लक्ष्मीकांत बेर्डे यांचा लेक अभिनय बेर्डे आहे. अभिनय बेर्डेने आपल्या दमदार अभिनयाने प्रेक्षकांच्या मनात मोलाचे स्थान निर्माण केले आहे. त्याच्या अभिनयाची तरुणाईमध्ये क्रेझ पाहायला मिळते. त्याने आजवर अनेक नाटक आणि चित्रपटांमध्ये काम केले आहे. नुकताच अभिनय बेर्डेने सोशल मीडियावर व्हिडीओ शेअर करून आपण ब्रेक घेत असल्याचा खुलासा केला आहे.

व्हिडीओत नेमकं काय?

व्हिडीओत अभिनय बेर्डे म्हणतो की, "हाय मी अभिनय, आज व्हिडीओ बनवण्याचे कारण खूप वेगळे आणि महत्त्वाचे आहे. मी माझ्या करिअरपासून थोडा ब्रेक घ्यायचे ठरवले आहे, आणि तो ब्रेक यासाठी आहे की, मी स्वत:चा स्टार्टअप सुरू करणार आहे. त्यासाठी काही नवीन आयडिया हव्या आहेत. अजून आयडियाच्या टप्प्यात आहे मी. अजून आयडिया सुचलेली नाही आहे. त्यामुळे मला तुमची मदत लागेल. त्यामुळे तुमच्याकडे Out Of The Box काही क्रेझी आयडिया असतील तर, कमेंट्समध्ये मला नक्की कळवा."

व्हिडीओच्या कॅप्शनमध्ये लिहिलं की, "मी करिअरमधून ब्रेक घेतोय...पुढच्या प्रवासासाठी मला तुमच्या मदतीची गरज आहे. कारण जाणून घेण्यासाठी हा व्हिडीओ शेवटपर्यंत बघा आणि नक्की कमेंट करा..." अभिनेत्याने शेअर केलेल्या व्हिडीओवर चाहते आणि कलाकार मंडळी कमेंट्स आणि शुभेच्छांचा वर्षाव करत आहे. अभिनयला त्याच्या नवीन व्यवसायासाठी शुभेच्छा देत आहेत. आता चाहते अभिनय बेर्डेचा दमदार कमबॅक पाहण्यासाठी आणि त्याच्या नवीन स्टार्टअपसाठी खूपच उत्सुक आहेत.

अभिनयचे चित्रपट

२०१७ साली रिलीज झालेल्या 'ती सध्या काय करते' या चित्रपटातून मनोरंजन विश्वात पाऊल ठेवले. त्याच्या या चित्रपटाला प्रेक्षकांनी भरपूर प्रेम दिले. त्यानंतर अभिनय अनेक चित्रपटांमध्ये दिसला. यात 'मन कस्तुरी रे', 'अशी ही आशिकी', 'Boyz 4', 'दशावतार', 'उत्तर','वडापाव', 'रंपाट' यांचा समावेश आहे.