Ranya Rao Gold Smuggling : सोने तस्करी प्रकरणात कन्नड अभिनेत्री रान्या राव बंगळुरू मध्यवर्ती कारागृहात आहे. या तस्करी प्रकरणात मोठी बातमी समोर आली आहे. पीटीआय वृत्तसंस्थेनुसार, या प्रकरणी गुप्तचर संचालनालयाने (डीआरआय) तिच्यावर १०२ कोटी रुपयांचा दंड ठोठावला आहे. ३ मार्च रोजी दुबईहून परतताना बंगळुरूच्या आंतरराष्ट्रीय विमानतळावर रान्याला १४.८ किलो सोन्यासह पकडले होते.

अभिनेत्री रान्या रावला सोने तस्करी प्रकरणात डीआरआयने २,५०० पानांची नोटीस दिली आहे. या प्रकरणी रान्याला १०२ कोटींचा दंड ठोठावण्यात आला आहे. तिच्यासह तीन जणांना ५० कोटी रुपयांपेक्षा जास्त दंड ठोठावला आहे. सध्या सोने तस्करी प्रकरणातील रान्या रावसह इतर आरोपी बंगळुरू मध्यवर्ती तुरुंगात आहेत.

मिळालेल्या माहितीनुसार, ३ मार्च रोजी रान्या रावला ताब्यात घेण्यात आले होते. त्यानंतर प्रकरणाची चौकशी सुरु झाली. रान्या २०२३ ते २०२५ दरम्यान ४५ वेळा दुबईला गेल्याचे उघड झाले. दुबईवरुन भारतामध्ये परतत असताना रान्याकडून जितके सोने ताब्यात घेण्यात आले, त्याची किंमत १२.५६ कोटी रुपये इतकी होती असा अंदाज वर्तवण्यात आला आहे.

रान्या रावकडून ताब्यात घेतलेले सोने तिला दुबई विमानतळावरुन तरुण कोंडुरु राजू यांनी दिले होते, ही माहिती समोर आली आहे. तरुण कोंडुरु राजू हा तेलुगू चित्रपटात काम करतो. त्याच्याकडे अमेरिकेचे नागरिकत्व आहे. अमेरिकन पासपोर्टचा गैरवापर केल्याचे डीआरआयने न्यायालयात म्हटले होते. या सोने तस्करी प्रकरणात रान्या रावच्या अडचणी वाढत असल्याचे चित्र पाहायला मिळत आहे.