तो आला अन् माझ्या स्तनांना स्पर्श केला, प्रसिद्ध अभिनेत्रीनं सांगितला तिच्यासोबत घडलेला भयंकर अनुभव

Priya Bapat Interview : प्रिया बापट आणि उमेश कामत यांचा 'बिन लग्नाची गोष्ट' हा चित्रपट १२ सप्टेंबर रोजी प्रदर्शित होणार आहे. या चित्रपटाच्या प्रमोशनमध्ये सध्या प्रिया बापट व्यग्र आहे. प्रिया बापटच्या एका जुन्या मुलाखतीची सोशल मीडियावर चर्चा पाहायला मिळत आहे. मुलाखतीमध्ये प्रिया बापटने तिच्याबरोबर दादरमध्ये घडलेला भयानक अनुभव शेअर केला होता.

'हॉटरफ्लाय'ला प्रिया बापटने मुलाखत दिली होती. या मुलाखतीदरम्यान तिने छेडछाडीचा प्रसंगाबाबत सांगितले होते. प्रिया बापट म्हणाली होती, '२०१० मध्ये मुंबईच्या दादरमध्ये हा प्रकार घडला होता. माझ्या घराजवळच्या गल्लीमध्ये ही घटना घडली होती. शूटिंग संपल्यावर घरी येत होते. तेव्हा माझ्या मैत्रिणींशी फोनवर बोलत होते. फोनवर बोलताना माझ्या हातात सामान देखील होते.'

'कानाला फोन लावून हातात सामान घेऊन घरी जात होते. तेव्हा समोरुन एकजण आला. त्याने माझ्या स्तनांना हात लावला आणि तो पळून गेला. काय झालं ते मला कळलंच नाही. जे काही घडलंय ते समजायला मला ३ सेकंद लागले. मी गल्लीत फक्त उभी राहिले. तेव्हा काय झालं, ते मला कळतंच नव्हतं. मी मागे वळून पाहिलं तर तो माणूस तिथे नव्हता. तो कधीच पळून गेला होता', असे प्रिया बापटने मुलाखतीत म्हटले होते.

प्रिया म्हणाली, 'घरी गेले तेव्हा माझी आई घरी नव्हती, बाबा होते. घरात गेल्यानंतर मी ढसाढसा रडायला सुरुवात केली. बाबांनी मला विचारलं, काय झालं? गल्लीमध्ये माझ्यासोबत जे काही झालं ते मी त्यांना सांगितलं. त्यांना एक पुरुष म्हणून लाज वाटली. काय करावं हे त्यांनाही समजत नव्हतं. मी ठरवलं, कोणी माझ्या वाट्याला आलं, तर त्याला मी सोडणार नाही. तेव्हाचा राग माझ्या मनात अजूनही आहे.'