लग्नाच्या ४ वर्षानंतर प्रसिद्ध सिंगर कनिका कपूरने पती गौतम हाथीरमानीसोबत वेगळे होण्याचा निर्णय घेतला आहे. कनिकाने सोशल मीडियावर एक पोस्ट शेअर करत याविषयी माहिती दिली आहे. त्यामुळे तिच्या चाहत्यांना देखील धक्का बसला आहे.

'बेबी डॉल' सिंगर कनिका कपूरने दुसऱ्यांदा घटस्फोट घेतला आहे. कनिकाने स्वत: इन्स्टाग्रामवर या संदर्भातली पोस्ट शेअर केली आहे. पोस्टमध्ये तिने' 'खूप विचार करून आम्ही हा निर्णय घेतल्याचे सांगितले आहे. दोघांनीही सामंजस्यपणे हा निर्णय घेतला असून आमच्या खाजगी आयुष्याचा आदर करावा, 'अशी विनंती तिने केली आहे.

कोण आहेत गौतम हाथीरमानी?

गौतम हाथीरमानी हे प्रसिद्ध बिझनेसमॅन आहेत. लंडन येथे त्याचा बिझनेस आहे. साधारण १५ वर्षांच्या मैत्रीनंतर कनिका आणि गौतम यांनी लग्न करण्याचा निर्णय घेतला. २०२२ मध्ये कनिका आणि गौतम यांचा विवाह काही जवळच्या नातेवाईकांमध्ये लंडनमध्ये पार पडला.

मागील अनेक दिवसांपासून कनिका आणि गौतम यांच्या घटस्फोटाच्या अफवा सोशल मीडियावर सुरू होत्या. या अफवांना पूर्णविराम देत प्रसिद्ध गायिका कनिकाने स्वत:च पोस्ट शेअर करत घटस्फोटाची माहिती दिली. दोघांनीही अत्यंत विचार विनिमय करून सामंजस्यपणे निर्णय घेतल्याचे तिने स्पष्ट केलं आहे.