संजय गडदे, साम टिव्ही

Rohit Shetty Home Firing case: प्रसिद्ध बॉलिवूड निर्माता-दिग्दर्शक रोहित शेट्टी यांच्या घराजवळ झालेल्या फायरिंग प्रकरणात मोठी कारवाई करत मुंबई पोलिसांनी एक महत्त्वाचा वाँटेड आरोपी अटक केला आहे. उत्तर प्रदेशातील आग्रा येथून प्रदीपकुमार रामसिंह उर्फ ‘गट्टू’ उर्फ ‘छोटू’ याला ताब्यात घेण्यात आले.

मुंबई पोलिसांच्या विशेष पथकाने उत्तर प्रदेश स्पेशल टास्क फोर्सच्या मदतीने ही कारवाई केली. आरोपीला ट्रान्झिट रिमांडवर मुंबईत आणण्यात येत असून पुढील चौकशीसाठी त्याला गुन्हे शाखेकडे सोपवण्यात आले आहे. 31 जानेवारीच्या रात्री उशिरा रोहित शेट्टी यांच्या जुहू येथील घराजवळ अज्ञात व्यक्तींनी गोळीबार केला होता. या घटनेत कोणीही जखमी झाले नव्हते, मात्र परिसरात मोठी भीती आणि तणावाचे वातावरण निर्माण झाले होते. या प्रकरणी जुहू पोलीस ठाण्यात गुन्हा दाखल करण्यात आला होता.

तपासात उघड झालेले धागेदोरे

तपासादरम्यान हे प्रकरण खंडणीसाठी रचलेला कट असल्याचे समोर आले. मुख्य सूत्रधार शुभम लोणकर याने सोशल मीडियावरील पोस्ट पाहून प्रदीपकुमारला आपल्या टोळीत सामील करून घेतले होते. रोहित शेट्टी यांच्या घराजवळ फायरिंग करून बॉलिवूडमध्ये दहशत निर्माण करणे आणि त्यानंतर कोट्यवधी रुपयांची खंडणी उकळण्याचा त्यांचा प्लॅन होता.या टोळीत अनेक तरुणांना सामील करून त्यांना मोठ्या पैशांचे आमिष दाखवण्यात आले होते. प्रदीपकुमारही त्याच टोळीचा भाग होता.

या प्रकरणात यापूर्वीच मुंबई पोलिसांनी हरियाणा, उत्तर प्रदेश आणि पुणे येथून मुख्य शूटरसह सात जणांना अटक केली आहे. पुण्यातून स्वप्निल बंडू सकटे, समर्थ शिवशरण पोमाजी, सिद्धार्थ दीपक येनपुरे आणि आदित्य ज्ञानेश्वर गायकवाड यांना अटक करण्यात आली होती.

प्रदीपकुमार गेल्या चार महिन्यांपासून फरार होता आणि सतत पोलिसांना चकवा देत होता. अखेर तो आग्रा येथील घरी येणार असल्याची माहिती मिळाल्यानंतर पोलिसांनी सापळा रचून त्याला पकडले. अटक केलेल्या आरोपीला न्यायालयात हजर करून अधिक पोलीस कोठडी मागितली जाणार आहे. त्याच्या चौकशीतून या कटामागील आणखी धक्कादायक माहिती समोर येण्याची शक्यता पोलिसांनी व्यक्त केली आहे.