मुंबई : मल्याळम टीव्ही इंडस्ट्रीतून दु:खद बातमी हाती आली आहे. मल्याळम टीव्ही अभिनेते दिलीप शंकर यांचं निधन झालं आहे. आज रविवारी सकाळी त्यांचा एका हॉटेल रुममध्ये मृतदेह आढळला. टीव्ही शो 'पंचगनी'च्या शुटिंगसाठी त्याच हॉटेलमध्ये थांबले होते. दिलीप शंकर थांबलेल्या हॉटेल रुममधून दुर्गंध येऊ लागल्याने ही घटना उघडकीस आली. दिलीप शंकर यांच्या निधनाने सिनेसृष्टीवर शोककळा पसरली आहे.

मीडिया रिपोर्टनुसार, दिलीप शंकर हे गेल्या चार दिवसांपासून पहिल्या टेलिव्हिजन शो 'पंचाग्नि'च्या शूटिंगसाठी तिरुवनंतपुरमच्या वनरोस जंक्शनजवळ एका हॉटेलात थांबले होते. एर्नाकुलममध्ये लोकांनी अभिनेते दिलीप यांना गेल्या दोन दिवसांपासून हॉटेलच्या बाहेर पाहिलं नव्हतं. रविवारी सकाळी अभिनेते दिलीप शंकर यांच्या घरातून दुर्गंध येऊ लागला. त्यामुळे हॉटेल कर्मचाऱ्यांनी रुमचा दरवाचा उघडून पाहिला. त्यावेळी अभिनेता दिलीप शंकर मृतवस्थेत आढळले.

अभिनेते दिलीप शंकर यांचा मृतदेह हॉटेलच्या रुममध्ये सापडल्यानंतर तेथील कर्मचाऱ्यांनी तातडीने पोलिसांना सूचना दिली. हॉटेल कर्मचाऱ्यांकडून सूचना मिळाल्यानंतर पोलिसांनी गुन्हा नोंदवून तपासाला सुरुवात केली. दिलीप शंकर यांच्या कार्यक्रमाच्या दिग्दर्शकने म्हटलं की, 'शुटिंगसाठी दोन दिवसांचा ब्रेक होता. या कालावधित दिलीप यांनी त्याच्या इतर सहकाऱ्यांचे फोन घेतले नाहीत. त्यांनी अनेकदा संपर्क साधण्याचा प्रयत्न केला. दिलीप हे आरोग्याशी निगडीत समस्यांना सामोरे जात होते, असे त्यांच्या टेलिव्हिजन शोच्या दिग्दर्शनकांनी सांगितलं.

मल्याळम फिल्म आणि टेलिव्हिजन जगतातील दिलीप शंकर यांचा प्रसिद्ध चेहरा आहे. दिलीप यांनी 'अम्मारियाथे', 'सुंदरी' आणि 'पंचाग्नि' सारख्या हिट सिनेमांमध्ये अभिनय केला आहे. या व्यतिरिक्त 'नॉर्थ २४' आणि 'चप्पा कुरीश' सारख्या हिट सिनेमांमध्येही दिलीप यांनी काम केलं आहे.