'दंगल' फेम अभिनेत्री झायरा वसीमला (Zaira Wasim) पितृशोक झाला आहे. झायराच्या वडिलांचे निधन झाले आहे. झायराने सोशल मीडियाच्या माध्यमातून ही माहिती चाहत्यांना दिली आहे.

झायरा खानने दंगल चित्रपटात आमिर खानच्या मुलीची भूमिका साकारली होती. या चित्रपटामुळे ती प्रसिद्धीझोतात आली होती. यानंतर तिने अनेक चित्रपटात काम केले. काही दिवसांपूर्वीच तिने चित्रपटसृष्टी सोडण्याचा निर्णय घेतला होता. झायराच्या वडिलांच्या अचानक जाण्याने झायरा आणि तिच्या कुटुंबावर दुःखाचा डोंगर कोसळला आहे.

झायराने सोशल मीडियावरुन ही माहिती शेअर केली आहे. वडिलांसोबतचा फोटो झायराने इन्स्टाग्रामवर पोस्ट केला आहे. यावर तिने 'माझे वडील जाहिद वसीम यांचे दुःखद निधन झाले आहे. त्यांना तुमच्या प्रार्थनेत कायम लक्षात ठेवा. अल्लाह त्यांच्या सर्व चुका माफ करेन. त्यांना सर्व दुःखापासून वाचव. त्यांचा पुढचा प्रवास सोपा करेल. त्यांना लवकर बोलावले आहे. त्यांना जन्नतमध्ये सर्वोच्च जागा दिली जाईल. आपण सर्वजण अल्लाहचेच आहोत', असं कॅप्शन तिने लिहलं आहे.

झायराबद्दल बोलायचे झाले तर, झायरा ही जम्मू काश्मीरच्या श्रीनगरमध्ये राहते. तिने 'दंगल' (Dangal)चित्रपटात गीता फोगट यांची लहानपणीची भूमिका साकारली होती. त्यानंतर तिने टद स्काय इज पिंक (The Sky Is Pink), 'सिक्रेट सुपरस्टार' (Secret Superstar) या चित्रपटात काम केले होते. झायराने सध्या चित्रपटसृष्टीपासून लांब राहण्याचा निर्णय घेतला आहे.