बॉलिवूडची प्रसिद्ध गायिका कनिका कपूरचा (Kanika Kapoor ) मोठा चाहता वर्ग आहे. तिने आपल्या स्टाइल आणि आवाजाने तरुणाईला वेड लावले आहे. नुकताच मेघालयातील मेगाँग महोत्सवात कनिकाने आपल्या गाण्याने चारचाँद लावले. मात्र लाईव्ह कॉन्सर्टमध्ये कनिकासोबत एका चाहत्याने गैरवर्तन केले. ज्याचा व्हिडीओ सोशल मीडियावर तुफान व्हायरल होत आहे.

7 डिसेंबर रोजी मेघालयातील मेगाँग महोत्सवात गायिका कनिका कपूरने लाईव्ह परफॉर्मन्स दिला. कनिका कपूर गात असताना एका चाहत्याने स्टेजवर चढून कनिकाचे पाय पकडून तिला पकडण्याचा प्रयत्न केला. तिच्या जवळ जाण्याचा प्रयत्न केला. मात्र तेवढ्यात सुरक्षा रक्षक तेथे आले आणि त्या चाहत्याला बाजूला घेऊन गेले. मात्र अचानक घडलेल्या या प्रसंगाने घाबरून न जाता, कनिका कपूरने परिस्थिती शांतपणे हाताळली आणि गाणे पुढे चालू ठेवले.

व्हायरल झालेल्या व्हिडिओमध्ये गायिका कनिका कपूर 'काला चष्मा' गाताना दिसत आहे. अचानक प्रेक्षकांमधील एका चाहत्याने स्टेजवर उडी मारली आणि तिचे पाय धरले. कनिकाने लगेच त्याला ढकलून दिले. त्यानंतर, कनिकाचे सह-कलाकार आणि बाउन्सर चाहत्याला स्टेजवरून बाहेर काढले. कनिका कपूरचा हा व्हिडीओ सोशल मीडियावर तुफान व्हायरल होत आहे.

कनिका कपूरसोबत घडलेला हा प्रकार पाहून नेटकरी चांगलेच संतापले आहेत. त्यांनी कनिका कपूरच्या सुरक्षिततेवर प्रश्न चिन्हा निर्माण केले. तर महिलांच्या सुरक्षेवर बोलताना नेटकरी दिसले. एका युजरने लिहिलं की, "इतक्या लोकांसमोर स्टेजवरही महिला सुरक्षित नाहीत..." तसेच त्या मुलाला किंवा चाहत्याला चांगली शिक्षा द्यावी असे देखील बोले जात आहे.

कनिका कपूरने आजवर अनेक सुपरहिट गाणी गायली आहेत. यात 'चिट्टियां कलाइयां', 'लव्ह लेटर', 'बेबी डॉल' 'जुगनी जी', 'कमली', 'बीट पे बूटी' यांसारख्या गाण्यांचा समावेश आहे.