Sonu Sood:

बॉलिवूड (Bollywood) अभिनेता सोनू सूद (Sonu Sood) फक्त आपल्या चित्रपटांमुळेच नाही तर सामाजिक कार्यामुळे देखील चर्चेत असतो. कोरोना काळामध्ये सोनू सूदने रस्त्यावर उतरून सर्वांना मदत केली. आजही सोनू सूद शक्य होईल तितकी मदत करत असतो. कोरोना काळात (Corona) सोनू सूदला अनेकांनी देव मानले. आता सोनू सूद पुन्हा त्याच्या सामाजिक कार्यामुळे चर्चेत आला आहे.

सोनू सूदने आज पुन्हा रस्त्यावर उतरून लोकांना मदत केली आहे. महाराष्ट्र हायवे ट्राफिक पोलीस प्रशासनाच्या वतीने आज मुंबईच्या अंधेरी पश्चिमेकडील लिंक रोड परिसरात एक आगळा वेगळा कार्यक्रम हाती घेण्यात आला होता. मुंबईत दुचाकीवरून पडून मृत्यू होण्याचे प्रमाण अधिक आहे. हे पाहता विना हेल्मेट दुचाकी चालवणाऱ्या तरुणांना मोफत हेल्मेट वाटप करण्याचा कार्यक्रम महाराष्ट्र हायवे ट्राफिक पोलिसांकडून हाती घेण्यात आला. या उपक्रमाद्वारे सोनू सूदच्या हस्ते हेल्मेटचे वाटप करण्यात आले.

महाराष्ट्र हायवे ट्राफिक एडीजी रवींद्र शिंकला आणि अभिनेता सोनू सूद यांनी या कार्यक्रमाला उपस्थित लावून विना हेल्मेट बाईक चालवणाऱ्या तरुणांना मोफत हेल्मेट वाटप करून जनजागृती केली. 'रस्त्यावर कांड न करता कर्म करा' असा संदेश यावेळी अभिनेता सोनू सूद आणि महाराष्ट्र हायवे ट्राफिक एडीजी रवींद्र शिंकला यांनी दुचाकीस्वारांना दिला.

पोलिसांना मदत करत सोनू सूदने दुचाकीस्वारांना नवीन हेल्मेटचे वाटपही केले. अभिनेत्याने लोकांना स्वतःच्या हातांनी हेल्मेट घालताना वाहतुकीचे नियम पाळण्याची विनंती केली. सोनूने सांगितले की, 'लोकांनी आपल्या कुटुंबाची आणि देशाच्या कायद्याची काळजी करताना वाहतूक नियमांचे पालन केले पाहिजे आणि हेल्मेट घालूनच दुचाकी चालवावी.' नागरिकांनी वाहतूक नियमांचे पालन करण्याचे असे आवाहन यावेळी करण्यात आले.