'बिग बॉस मराठी'चा नवा सीझन प्रेक्षकांवर अधिराज्य गाजवत आहे. पहिल्या दिवशी सदस्यांना पाणी नसणं आणि नाश्ता न मिळणं अशा अनेक गोष्टींचा सामना करावा लागला. 'बिग बॉस'चं घर म्हटल्यावर घरात प्रेम, वाद आणि तंटा आलाच. आता बिग बॉस सुरू होऊन एक दिवस होतात ना होतात तेच पहिल्या दिवसापासूनच प्रेमाचे वारे वाहायला सुरुवात झाली आहे.

'बिग बॉस मराठी'च्या ग्रँड प्रीमियरच्या दिवशी निक्की तांबोळीने रितेश भाऊसमोरच स्प्लिट्सविला फेम अरबाज पटेलवर फिदा झालेली दिसून आली. आता दुसऱ्या दिवशी छोटा पुढारी अर्थात घन:श्याम दरवडे निक्की आणि अरबाज यांना ग्रीन सिग्नल देताना दिसून येणार आहे. 'बिग बॉस मराठी'च्या दुसऱ्या दिवसाचा प्रोमो समोर आला असून दुसऱ्याच दिवशी घरातील सदस्य रोमँटिक अंदाजात दिसून आले आहेत. व्हायरल होत असलेल्या प्रोमोमध्ये, निक्की तांबोळी किचनमध्ये चहा बनवायला जाते. पण हीटर चालत नसल्याने ती छोटा पुढारीला 'बिग बॉस'कडे हीटर सुरू करून देण्याची विनंती करते.

तर निक्कीचं म्हणणं ऐकून छोटा पुढारी 'बिग बॉस'ला म्हणतो," किमान आमच्या वहिनींचं तरी 'बिग बॉस'..." त्यावर अरबाज त्याला म्हणतो,"थांबरे सकाळी सकाळी असं काय म्हणतो तू..." पुढे त्याच्या ह्या विधानावर छोटा पुढारी म्हणतो,"तुझं प्रेम उतू चाललंय ते सांगतोय... चहा उतू गेला तर काही बिघडत नाही." छोटा पुढारीच्या या विधानावर निक्की पोट धरून हसते. तर अरबाजने हसत- हसत डोक्यालाच हात लावला. त्यानंतरही छोटा पुढारी पुढे म्हणतो, "प्रेमात असंच असतंय बिग बॉस..." छोटा पुढारीमुळे 'बिग बॉस मराठी'च्या घरात हास्य कल्लोळ होतो.

'बिग बॉस मराठी'च्या ग्रँड प्रीमियरला निक्की तांबोळी अरबाजकडे पाहून लाजताना दिसली होती. अरबाजला पाहून सगळंच विसरल्याचं ती बिग बॉसच्या घरात म्हणाली होती. रितेश भाऊलाही निक्की थोडं थोडं काहीतरी होऊ शकतं असं म्हणाली होती. " आता तर निक्कीला सगळीकडे मीच दिसेन, माझ्याशिवाय तिला दुसरं काही सुचणार नाही." असं अरबाज म्हणाला होता. त्यामुळे आता 'बिग बॉस मराठी'च्या या सीझनमध्ये निक्की आणि अरबाजची जोडी जमणार का? याकडे सर्व चाहत्यांचे लक्ष लागले आहे.

पहिल्या दिवशी बिग बॉसच्या घरात, पाणी नव्हतं आणि नाश्ता नव्हता. त्यामुळे पहिल्याच दिवशी सर्व स्पर्धकांची चांगलीच तारांबळ उडाली होती. आता दुसऱ्या दिवशीही हीटर बंद असल्यामुळे बिग बॉसच्या घरात आता काय पाहायला मिळणार ? हे पाहणं औत्सुक्याचे ठरणार आहे.