सध्या मनोरंजनसृष्टीत लग्नसराई पाहायला मिळत आहे. 'बिग बॉस मराठी 5' चा विजेता सूरज चव्हाण, पूजा बिरारी-सोहम बांदेकर, प्राजक्ता गायकवाड, तेजस्विनी लोणारी हे सर्व कलाकार लग्न बंधानात अडकले आहेत. आता यांच्याच पाठोपाठ बिग बॉस मराठी फेम अभिनेता जय दुधाणे देखील लवकरच बोहल्यावर चढणार आहे. नुकतेच त्याचे केळवण पार पडले आहे.

लालबाग, ठाणे येथील 'माजघर'मध्ये थाटामाटात जय दुधाणेचा केळवण कार्यक्रम पार पडला. व्हिडीओमध्ये आपल्याला सुंदर डेकोरेशन पाहायला मिळत आहे. केळीच्या पानावर 'जयचं केळवण' लिहिलेले दिसत आहे. मराठमोळ्या पद्धतीने जयचे केळवण पार पडले. त्याचे औक्षण करण्यात आले. जयच्या कुटुंबाने हा सुंदर केळवण कार्यक्रम आयोजित केला होता. जयच्या समोर पंचपक्वानांचे ताट पाहायला मिळत आहे. केळवण कार्यक्रमात जय खूपच खुश दिसत आहे.

जय दुधाणे सोशल मीडिया इन्फ्लुएन्सर आणि प्रसिद्ध युट्यूबर हर्षला पाटीलसोबत लग्नगाठ बांधणार आहे. ही दोघे अनेक वर्षांपासून एकमेकांना डेट करत आहेत. मार्च महिन्यात जयने मसुरी येथे हर्षला प्रपोज केले होते आणि आपल्या प्रेमाची कबुली दिली. त्यांचा हा व्हिडीओ सोशल मीडियावर तुफान व्हायरल झाला.

वर्कफ्रंट

जय दुधाणेने अनेक रिअ‍ॅलिटी शो मध्ये भाग घेतला आहे. तो 'बिग बॉस मराठी 3' मध्ये झळकला. तसेच जय दुधाणे Splitsvilla 13 चा विजेता देखील ठरला आहे. तर 'बिग बॉस मराठी 3' तो उपविजेता ठरला. तसेच त्याने 'येड लागलं प्रेमाचं' या मालिकेत काम केले आहे. चाहते आता त्याच्या लग्नाची उत्सुकतेने वाट पाहत आहेत.