बॉलिवूडच्या प्रसिद्ध अभिनेत्रीने मोठा निर्णय घेतला आहे. अभिनेत्रीनेही भारत कायमचा सोडल्याचे सांगितले आहे. तब्बल १६ वर्ष भारतात राहिल्यानंतर तिने आता मोठा निर्णय घेतला. ही अभिनेत्री दुसरी-तिसरी कोणी नसून मंदाना करीमी (Mandana Karimi) आहे.

नुकतेच मंदाना करीमीने इन्स्टाग्रामवर (Ask Me Anything - मला काहीही विचारा) अशी पोस्ट टाकली होती. तेव्हा एका चाहत्याने तिला विचारले की, "तू मुंबई कायमची सोडून दिली आहेस का? तुला या शहराची आठवण येते का?" या प्रश्नाचे उत्तर देत अभिनेत्री म्हणाली की, "मी असे काही म्हणेन किंवा असा क्षण येईल, याची मी कधीच कल्पना केली नव्हती किंवा माझा त्यावर विश्वासही बसला नसता; पण... निरोप, भारत!"

मंदाना करीमीने पुढे म्हटले की, "हे खूप कठीण आहे. पण भारतात जवळपास १६ वर्षे घालवल्यानंतर, अखेर... मी माझे 'दुसरे घर' मागे सोडून जात आहे आणि आता नव्या सुरुवातींकडे वाटचाल! नवा देश, नवे घर, सर्व काही नवे..." तिच्या या उत्तराने चाहते खूपच भावुक झाले आहेत. यापूर्वी प्रसारमाध्यमांशी संवाद साधताना मंदाना करीमीने सांगितले होते की, सुरक्षेच्या कारणास्तव ती भारत सोडण्याचा विचार करत आहे.

मंदाना करीमी हिचा जन्म इराण मध्ये झाला. तिने आपल्या करिअरची सुरूवात मॉडेलिंगपासून केली. 2015 मध्ये रिलीज झालेल्या 'भाग जॉनी' चित्रपटातून अभिनेत्रीने बॉलिवूडमध्ये एन्ट्री घेतली. तिने लोकप्रिय रिॲलिटी शो 'बिग बॉस' च्या नवव्या पर्वात सहभागी झाली होती. ज्यामुळे अभिनेत्री घराघरात पोहोचली आणि एक ओळखीचा चेहरा बनली. २०१५ मध्ये पार पडलेल्या या शोच्या पर्वात ती 'दुसरी उपविजेती'ठरली होती.२०२२ मध्ये आलेल्या 'लॉक अप' या आणखी एका रिॲलिटी शोमध्येही मंदाना करीमी दिसली.