Mumbai Pune Expressway : मुंबई-पुणे एक्सप्रेसवेवर खंडाळा घाट उतरताना मिनी बस उलटली, मंकी हिल परिसरात अपघात

दिलीप कांबळे, मावळ प्रतिनिधी, साम टीव्ही मराठी

Mumbai Pune Expressway accident News : मुंबई-पुणे महामार्गावरील बोरघाटात मंकी हिल परिसरात एका मिनी बसचा भीषण अपघात झाला आहे. मंकी हिल येथील बॅटरी पॉईंटजवळ मिनी बस उलटल्याची घटना घडली. या अपघातात आठ जण गंभीर जखमी झाले आहेत. (Mini bus accident near Monkey Hill today, Mumbai Pune Expressway latest accident)

हा अपघात खंडाळा घाट उतरताना अमृतांजन पुलाच्या वरच्या बाजूला, जुन्या मुंबई-पुणे राष्ट्रीय महामार्गावरील 'एचओसी' (HOC) ब्रिज परिसरात घडला. अपघातानंतर घटनास्थळी एकच गोंधळ उडाला होता. घटनेची माहिती मिळताच आयआरबी (IRB) प्रशासन, खासगी रुग्णवाहिका तसेच 'देवदूत' यंत्रणेसह स्थानिक मदत पथकाचे सदस्य तातडीने घटनास्थळी दाखल झाले.

जखमींना तातडीने उपचारासाठी खोपोली नगरपरिषद रुग्णालयात दाखल करण्यात आले आहे. सुदैवाने, यातील ६ ते ७ प्रवासी किरकोळ जखमी असून सर्व जखमी ठाणे जिल्ह्यातील मुरबाड येथील 'शेळके पाडा' परिसरातील रहिवासी असल्याची माहिती समोर आली आहे. ही घटना खोपोली पोलीस ठाण्याच्या हद्दीत घडली असून पोलीस या प्रकरणाचा अधिक तपास करत आहेत.

जखमींची नावे :

१. कस्तुरी गणेश माळी (वय १५)

२. कमलाबाई रामचंद्र माळी (वय ७०)

३. गुरुनाथ जयराम डोंगरे (वय ५५)

४. मीनाबाई गुरुनाथ डोंगरे

५. गुलाबबाई दत्तात्रय हुमणे

६. रवींद्र रामचंद्र माळी (वय ५०)

७. अशोक जयराम डोंगरे (वय ६०)

नाशिक-मालेगाव महामार्गावर बसचा भीषण अपघात; चालकाला हृदयविकाराचा झटका आल्याने बस उलटली

मुंबई-आग्रा महामार्गावर शहादा डेपोच्या बसला भीषण अपघात झाल्याची घटना घडली आहे. उमराणे शिवारात चालकाला चालत्या बसमध्ये हृदयविकाराचा झटका आल्याने हा अपघात झाला. सुदैवाने, या अपघातात कोणतीही जीवितहानी झालेली नाही. मिळालेल्या माहितीनुसार, शहादा डेपोची ही बस नाशिकहून मालेगावाकडे जात होती. उमराणे शिवारात बस आली असता, अचानक चालकाच्या छातीत दुखू लागले आणि त्यांना हृदयविकाराचा तीव्र झटका आला. यामुळे बसवरील नियंत्रण सुटले आणि बस महामार्गालगतच्या झाडावर जाऊन आदळली व पलटी झाली.

या बसमध्ये प्रवासी होते, त्यापैकी ४ प्रवासी किरकोळ जखमी झाले आहेत. अपघातानंतर स्थानिक नागरिकांनी तातडीने मदतीसाठी धाव घेतली. जखमी प्रवाशांना प्रथमोपचारासाठी मालेगाव येथील शासकीय रुग्णालयात दाखल करण्यात आले आहे. हृदयविकाराचा झटका आलेल्या बस चालकाला तातडीने मालेगावमधील एका खासगी रुग्णालयात हलवण्यात आले असून, त्यांच्यावर सध्या उपचार सुरू आहेत. घटनास्थळी पोलीस दाखल झाले असून पुढील तपास सुरू आहे.