'बिग बॉस २०'च्या दुसऱ्या आठवड्याच्या 'वीकेंड का वार'मध्ये होस्टिंग करताना सलमान खान याने छातीत दुखत असल्याची तक्रार केल्यामुळे चाहत्यांमध्ये त्याच्या आरोग्याबाबत चिंता व्यक्त केली गेली. त्यामुळे सोशल मीडियावर चांगलीच खळबळ उडाली. कार्यक्रमाच्या निर्मात्यांनी एक प्रोमो व्हिडिओ शेअर केला, ज्यामध्ये सलमान खान वेदनेने विव्हळत मंचावर पडलेला, छातीवर हात ठेवलेला आणि डॉक्टरांना बोलावताना दिसत होता. हा प्रोमो काही वेळातच व्हायरल झाला आणि चाहत्यांमध्ये चिंतेचे वातावरण निर्माण झाले. मात्र, बॉलिवूडच्या भाईजान सलमान खानने यावर स्पष्टीकरण दिले आहे. तो एकदम ठीक असून त्याला आरोग्याबाबत कोणतीही समस्या नाहीत, असे सलमानने सांगितले. सलमानने इन्स्टाग्राम २ स्टोरी पोस्ट केल्या आहेत.

सलमान खान इन्स्टाग्राम स्टोरी १

"देवाच्या कृपेने माझ्या आरोग्याला काहीही झालेलं नाही. 'बिग बॉस'चा प्रोमो ज्या पद्धतीने एडिट केला गेला, तसा तो करायला नको होता. त्यामुळे मूळ उद्देशच हरवला. जसं 'काझी'ने घरात वागलं होतं, तसंच मीही काहीतरी करतोय. ती कृती केवळ काझीला हे दाखवून देण्यासाठी होती की, त्याने केलेलं कृत्य चुकीचं होतं; कारण त्याने मनोरंजनासाठी आपल्या आरोग्याचा वापर केला होता. विशेषतः तेव्हा, जेव्हा घरातील इतर १५ जणांना तो केवळ नाटक करतोय हे माहित नव्हतं आणि ते त्याच्या आरोग्याबद्दल चिंतेत होते. प्रोमो ज्या प्रकारे एडिट केला गेला त्याबद्दल मी माफी मागतो. कदाचित शोच्या प्रमोशनसाठी ते अशाच पद्धतीचा वापर करत असावेत. त्यांच्या वतीने मी माफी मागते."

सलमान खान इन्स्टाग्राम स्टोरी २

"बिग बॉसने त्यात सुधारणा केली आहे...धन्यवाद बिग बॉस..."

निर्मात्यांनी आता एक नवीन प्रोमो शेअर केला आहे, ज्यामध्ये सलमान संपूर्ण घरातील सदस्यांसमोर काझी तौकीरच्या वागणुकीचा पर्दाफाश करताना दिसत आहे. या आठवड्यात 'वीकेंड का वार'मध्ये सलमान अत्यंत संतापलेल्या अवस्थेत दिसला. सलमान खानने महिला कलाकारांच्या लूकवरून त्यांना टार्गेट करणाऱ्या ट्रोलर्सना फटकारले. तसेच, स्वतःच्या आरोग्याबाबत आणि दिसण्याबाबत केल्या जाणाऱ्या तर्क-वितर्कांवरही त्याने भाष्य केले.