सनी देओलचा बहुप्रतीक्षित चित्रपट 'बटवारा १९४७' चा ट्रेलर अखेर प्रदर्शित झाला आहे. तसेच ट्रेलर प्रेक्षकांच्या चांगलाच पसंतीस आला आहे. सनी देओल मुख्य भूमिकेत असलेला आणि आमिर खान प्रॉडक्शन्सची निर्मिती असलेला हा ऐतिहासिक चित्रपट १९४७ च्या फाळणीवर आधारित आहे. असगर वजाहत यांच्या 'जिस लाहोर नई वेख्या, ओ जाम्या-ए-नई' या गाजलेल्या नाटकापासून प्रेरित असलेला हा चित्रपट आहे.

ट्रेलरमध्ये सनी देओलचे पात्र हिंसाचाराने विखुरलेल्या राष्ट्राच्या केंद्रस्थानी दाखवले आहे. दंगली उसळत असताना आणि कुटुंब जगण्यासाठी संघर्ष करत असताना, तो भीतीपुढे न झुकता धैर्याचे प्रतीक म्हणून समोर येतो. चित्रपटात सनी देओलचे डायलॉग खूपच भन्नाट आहे. जेव्हा कोणी त्याला विचारतं, "पंगा घ्यायचा आहे का?", तेव्हा तो त्याच्या खास तीव्रतेने उत्तर देतो, "इरादा तर नाही, पण आव्हान दिलं तर मी मागे हटणार नाही."

ॲक्शन आणि संघर्षाच्या पलिकडे, ट्रेलरमध्ये भावनांचा पूर पाहायला मिळत आहे. शबाना आझमी यांच्या दमदार अभिनयाने सर्वांचे लक्ष वेधून घेतले आहे. तर प्रिती झिंटाच्या अभिनयातून फाळणीच्या काळात असंख्य कुटुंबांनी अनुभवलेली भीती आणि अनिश्चितता प्रतिबिंबित होते. चित्रपटातील दृश्ये जळणारी घरे, हताश स्थलांतर आणि तुटलेली नाती टिपतात, जी जातीय हिंसाचाराचे विनाशकारी परिणाम अधोरेखित करतात.

'बटवारा १९४७' प्रदर्शनाची तारीख

राजकुमार संतोषी दिग्दर्शित 'बटवारा १९४७' हा चित्रपट १४ ऑगस्ट २०२६ रोजी चित्रपटगृहांमध्ये प्रदर्शित होणार आहे. या चित्रपटात करण देओल आणि अभिमन्यू सिंग यांच्याही महत्त्वपूर्ण भूमिका आहेत. चित्रपटाचे संगीत ए. आर. रहमान यांनी दिले असून, गीते जावेद अख्तर यांनी लिहिली आहेत. या चित्रपटाद्वारे दिग्दर्शक राजकुमार संतोषी आणि सनी देओल जवळपास तीन दशकांनंतर पुन्हा एकत्र येत आहेत.