Summary:

• प्रसिद्ध अभिनेता आणि गायक ऋषभ टंडनचे निधन

• दिल्लीमध्ये कुटुंबीयांना भेटायला गेले असता घडली घटना

• तीव्र हृदयविकाराच्या झटक्याने ऋषभ टंडनचे निधन

फिल्म इंडस्ट्रीला आणखी एक मोठा धक्का बसला आहे. प्रसिद्ध अभिनेता आणि गायक ऋषभ टंडनचे निधन झाले. हृदयविकाराच्या झटक्याने ऋषभचं निधन झालं असल्याची माहिती समोर आली आहे. त्याच्या निधनाचे वृत्त कळताच फिल्म इंडस्ट्रीसह चाहत्यांना मोठा धक्का बसला. सर्वजण सोशल मीडियावर पोस्ट करत दु:ख व्यक्त करत आहेत.

मिळालेल्या माहितीनुसार, फकीर म्हणून प्रसिद्ध असलेल्या गायक ऋषभ टंडनचे २१ ऑक्टोबर रोजी निधन झाले. ऋषभ कुटुंबीयांना भेटण्यासाठी दिल्लीला गेला होता. त्याचवेळी त्याला तीव्र हृदयविकाराचा झटका आला आणि त्याचे निधन झाले. ऋषभच्या जवळच्या मित्राने त्याच्या निधनाचे वृत्त सांगितले. ऋषभ टंडन हा मुंबईमध्ये राहत होता. तो प्रसिद्ध गायक, संगीतकार आणि अभिनेता होता.

प्रसिद्ध संगीतकार ऋषभ टंडनच्या निधनाने इंडस्ट्रीवर आणि त्यांच्या चाहत्यांना मोठा धक्का बसला. चाहते सोशल मीडियावर त्यांचे फोटो शेअर करून त्यांना श्रद्धांजली वाहत आहेत. गाण्यांव्यतिरिक्त ऋषभने टंडन 'फकीर - लिव्हिंग लिमिटलेस' आणि 'रुष्ना: द रे ऑफ लाईट' सारख्या चित्रपटांमध्ये काम केले आहे. एक उत्तम गायकासोबतच तो उत्तम अभिनेता देखील होता.

ऋषभ इन्स्टाग्रामवरही खूप सक्रिय होता. इन्स्टावर त्याचा मोठा चाहतावर्ग आहे. त्याचे इन्स्टाग्रामवर ४,४९,००० फॉलोअर्स होते. त्याच्या इन्स्टाग्राम अकाउंटनुसार तो भगवान शिवाचा एक महान भक्त होता. तो एक गायक, संगीतकार आणि अभिनेता देखील होता. त्याचे "इश्क फकीराना" हे गाणे खूप गाजले होते. एका आठवड्यापूर्वी ऋषभने त्याचा वाढदिवस पत्नीसोबत मोठ्या थाटामाटात साजरा केला होता.

सोशल मीडियावर अभिनेता ऋषभची शेवटची पोस्ट देखील त्याच्या वाढदिवसाचीच होती. ही पोस्ट ऋषभच्या पत्नीने अपलोड केली होती. तिने नंतर ती त्याच्या इन्स्टाग्रामवर पुन्हा शेअर केली. त्यामध्ये ऋषभ आणि त्याची पत्नी एक सुंदर पोज देताना दिसत आहेत. या व्हिडिओतून ऋषभ आणि त्याची पत्नी ओलेसिया यांच्यातील प्रेम दिसून येते. ऋषभच्या अचानक निधनामुळे त्याच्या पत्नीसह कुटुंबीयांना मोठा धक्का बसला आहे.