उत्तर प्रदेशची राजधानी लखनौमधून धक्कादायक बातमी समोर आली आहे. एका महिला इंस्पेक्टरने स्वतःच्या सासऱ्यांवर बलात्काराचा गंभीर आरोप केले आहे. या प्रकरणात पीडित महिला पोलीस अधिकाऱ्याने केवळ आरोपीवरच नव्हे, तर स्थानिक पोलिसांच्या भूमिकेवरही गंभीर प्रश्न उपस्थित केले आहेत. तक्रार देऊनही पोलिसांनी एफआयआर नोंदवण्यासाठी टाळाटाळ केल्याचा आरोप तिने केला आहे. या घटनेने परिसरात खळबळ उडाली आहे.

मिळालेल्या माहितीनुसार, महिला इंस्पेक्टरचे लग्न झाल्यापासून तिचे सासरे तिचा शारीरिक आणि मानसिक छळ करत होते. याबद्दल पीडितेने कुटुंबियांना माहिती दिल्यानंतर धमकवण्यात आले, तसेच आरोपीच्या काळ्या कृत्यांना पाठिंबा देण्यात आला. महिला इंस्पेक्टरच्या म्हणण्यानुसार, त्या गेल्या चार दिवसांपासून लखनौमधील पारा पोलीस स्टेशन आणि हान्स खेडा चौकीच्या सतत फेऱ्या मारत होत्या. मात्र, पोलिसांकडून कोणतीही ठोस कारवाई करण्यात आली नाही. उलट पोलिसांनी पुरावे मागत गुन्हा दाखल करण्यास उशीर केल्याचा आरोप त्यांनी केला आहे.

दरम्यान जेव्हा पीडितेने हान्स खेडा चौकी प्रभारी अधिकाऱ्यांना आपल्यासोबत घडलेला प्रकार सांगितला, तेव्हा तिला मदत करण्याऐवजी धमकावण्यात आले. चौकी प्रमुखाने त्यांना एका खोलीत कोंडून ठेवले आणि नोकरीवरून काढून टाकण्याची धमकी दिल्याचा धक्कादायक दावा त्यांनी केला आहे. महिला पोलीस अधिकारी असल्यामुळे स्वतःला न्याय मिळेल, अशी अपेक्षा होती. मात्र, स्वतः पोलीस दलात कार्यरत असूनही माझ्या तक्रारीची दखल घेतली जात नसल्याने त्यांनी नाराजी व्यक्त केली.

दरम्यान, हे प्रकरण चिघळल्यानंतर लखनौ पोलिसांनी सांगितले की, पीडितेच्या तक्रारीवरून एफआयआर नोंदवण्यात आला असून पुढील तपास सुरू आहे. या घटनेमुळे पोलीस प्रशासनाच्या कार्यपद्धतीवर गंभीर प्रश्नचिन्ह निर्माण झाले आहे.