नागपूरमध्ये एक धक्कादायक बातमी घडली आहे. नागपुरातील वायुसेना नगर येथे जवानाने स्वतःच्या रायफलने गोळी मारून आत्महत्या केल्याची घटना मध्यरात्री दीड वाजताच्या सुमारास घडली. मध्यरात्री ड्युटीवर कार्यरत असतानाच त्याने स्वतःवर गोळी झाडून आत्महत्या केल्याची माहिती समोर आली आहे. पोलीस स्टेशनचे कर्मचारी घटनास्थळी दाखल झालेले आहे.

या आत्महत्या मागे अजून काय कारण होतं हे स्पष्ट झालेले नाही. जयवीर सिंग असं या जवानाचं नाव आहे. संबंधित हा जवान नागपूरातील वायुसेना पोलीस ठाण्यात कार्यरत होता. तसेच या घटनेने पोलीस विभागात खळबळ उडाली आहे.

आम्ही पो. उपनि.राहुल पो. ठाणे. गिट्टीखदान नागपूर शहर आज दि. १० डिसेंबर रोजीचे २२.०० ते दि. ११ डिसेंबर चे १०.०० पर्यंत पो.ठाणे ला रात्रपाळी अधिकारी म्हणून कर्तव्यावर हजर असताना २.१५ वाजताचे सुमारास पोलीस ठाण्याला फोनद्वारे माहिती मिळाली की, वायुसेना मुख्यालय गार्ड पोस्ट अल्फा नं. ८ वर ड्यूटी वर असलेले जैविरसिंग यांनी आपल्या सर्विस रायफलने कपाळावर गोळी मारुन आत्महत्या केली आहे. सदर माहिती पोनि गुन्हे यांना देवून सदरचे घटनास्थळी पोलीस स्टाफसह नोंद क्र. ७ वेळ २.२९ प्रमाणे सि.आर. गाडीने रवाना झाले.

वायुसेना मुख्यालय गार्ड पोस्टचे दुसऱ्या माळ्यावर वायुसेना शासकिय गणवेश प्रधान केलेल्या स्थितीत जैविरसिंग हा जखमी अवस्थेत प्लॅस्टिक खुर्चीवर बसलेल्या स्थितीत दिसून आला. त्याची शासकिय रायफल ए.के. १०३ विना मॅग्झीनची त्याचे दोन्ही पायाच्या मधे दिसून आली. जैविरसिंग याच्या कपाळाच्या आणि डोक्याच्या मागे गंभीर जखम झालेले असून रक्तस्त्राव होताना दिसून आले. घटनास्थळी वायुसेनाचे वरिष्ठ अधिकारी आणि वायुसेनाचे शासकीय डॉ. राकेश हे तेथे हजर असून जैविरसिंग यांस तपासून मृत घोषित केले असे पोलीस अधिकारी म्हणाले.

तसेच दोन दिवसांपूर्वीही मुरबाडमध्येही एक घटना घडली. मुरबाड पोलीस ठाण्यात कार्यरत असलेले पोलीस हवालदार नामदेव चारस्कर यांनी इमारतीवरून उडी मारून आत्महत्या केल्याची धक्कादायक घटना घडली आहे. चारस्कर यांनी कामावर असताना हे टोकाचे पाऊल उचललं.

पोलीस ठाण्याच्या बाजूला असलेल्या पोलीस वसाहतीच्या इमारतीत ते राहत होते. या इमारतीच्या गच्चीवरून त्यांनी रात्री साडे आठ वाजताच्या सुमारास उडी मारून आत्महत्या केली. त्यांच्या आत्महत्या मागचं नेमकं कारण समजू शकले नाही. मात्र या घटनेने पोलीस दलात खळबळ उडाली आहे.