फलटणमधील डॉक्टर मृत्यू प्रकरणाची घटना ताजी असतानाच साताऱ्यात आखणी एक धक्कादायक घटना घडलीय. फलटणमध्ये एका तरुणीने गळफास घेत आयुष्याची दोर कापली. दरम्यान तरुणीने आत्महत्या का केली याचे कारणदेखील समोर आले आहे. आचल लखन पवार (वय १८, सोमवार पेठ, फलटण), असे आत्महत्या केलेल्या तरुणीचे नाव.

फलटण शहर पोलिसांनी दिलेली माहिती अशी की, आचल पवार हिचे आई-वडील सतत भांडण करत होते. तसेच वडील सतत दारू प्यायचे. हाच मानसिक त्रास सहन न झाल्याने आचल हिने राहत्या घरात लोखंडी अँगलला ओढणीने गळफास घेतला. हा प्रकार लक्षात आल्यानंतर तिच्या वडिलांनी तिचा गळफास सोडवून तातडीने तिला फलटण येथील शासकीय रुग्णालयात दाखल केलं. पण प्रकृती चिंताजनक बनल्याने तिला बारामती येथील एका खासगी दवाखान्यात दाखल केले. मात्र, शुक्रवारी पहाटे चार वाजता उपचारादरम्यान तिचा मृत्यू झाला.

हॉटेल मॅनेजमेंट करणाऱ्या तरुणीने आयुष्य संपवलं

तळोजा येथील एका इमारतीच्या दहाव्या मजल्यावरून उडी मारून अल्पवयीन मुलीने आपलं जीवन संपवल्याची घटना काही दिवसापूर्वी घडली होती. मृत मुलगी पनवेलमध्ये हॉटेल मॅनेजमेंटचा कोर्स करत होती. ती तिच्या पालकांसोबत इमारतीच्या १० व्या मजल्यावर राहत होती.आत्महत्या केली तेव्हा घरी कोणी नव्हतं. या मुलीने उडी का मारली? ही आत्महत्या होती की घातपात हे अद्यापही कळू शकलेलं नाहीये.