- रामनाथ ढाकणे

छत्रपती संभाजीनगर जिल्ह्यासह राज्याला हादरवून सोडणाऱ्या अवैध गर्भलिंग निदान आणि गर्भपात प्रकरणी शेकडो कळ्या गर्भातच खुडणाऱ्या रॅकेटमधील आणखी एका बोगस डॉक्टरचा पोलिसांनी भांडाफोड केला. भोकरदन तालुक्यातील हसनाबाद येथील इरफान हनीफ शेख या बोगस डॉक्टरला आणि पत्नीची गर्भलिंग निदान तपासणी करणा-या एकाला पाेलिसांनी अटक केली आहे.

पाेलिसांनी दिलेल्या माहितीनूसार इरफान हा हसनाबाद मध्ये डॉक्टर असलेल्या वडिलांचा दवाखाना स्वतः चालवत होता. ताे 12 पर्यंतच शिकला आहे. त्याचा 8 वर्षापासून हा गोरख धंदा सुरू होता. त्याशिवाय ऍलोपॅथी गोळ्यांसह त्याच्या दवाखान्यात अनेकदा गंडेदोर्याचेही प्रयोग झाल्याची माहिती आता तपासात समोर आल्याचे पाेलिसांनी नमूद केले.

धक्कादायक म्हणजे आठवडी बाजार असल्याने इरफानकडेही रुग्णांची गर्दी जास्त होती. त्यामुळे पोलिस देखील बनावट रुग्ण बनून गेले. तेव्हा इरफान रुग्णांचीच तपासणी करत असल्याचं उघडकीस आलं आणि तेव्हाच हे सगळं बिंग फुटलं. दरम्यान येणाऱ्या गर्भवती महिलांना तो लिंगनिदान करून देण्याचे सांगून गर्भपात करण्याची देखील जबाबदारी घेत असे तपासात निष्पन्न झाले आहे.

Edited By : Siddharth Latkar