नाशिकमधून भावाच्या नात्याला काळिमा फासणारी संतापजनक प्रकार समोर आला आहे. आडगाव शिवारात किरकोळ भांडणातून पोलीस पुत्र असलेल्या लहान भावाने आपल्या सख्ख्या मोठ्या भावाची हत्या केल्याची घटना घडली आहे. याबाबत आडगाव पोलीस ठाण्यात खुनाचा गुन्हा दाखल करण्यात आला असून संशयिताला पोलिसांनी बेड्या ठोकल्या आहेत.

मिळालेल्या माहितीनुसार, आडगाव शिवारातील डी मार्टच्या पाठीमागे असलेल्या सद्भावना पोलीस सोसायटीमध्ये राहणारे आणि ग्रामीण पोलीस दलात कार्यरत असणारे पोलीस कर्मचारी विजय गायकवाड हे आपली पत्नी आणि दोन मुलांसह राहतात. बुधवारी ते कामानिमित्त छत्रपती संभाजीनगर येथे गेले होते. यावेळी घरी त्यांची पत्नी, मोठा मुलगा संदीप विजय गायकवाड (वर्षे ३३) आणि लहान मुलगा अरविंद विजय गायकवाड (वर्षे ३१) हे घरी होते.

दुपारच्या सुमारास संदीप हा त्याच्या आईशी भांडण करत होता. यावेळी अरविंद याने त्याला आईशी भांडू नको असे सांगितले. याचा राग आल्याने दोघा भावांमध्ये भांडण सुरु झाले. यावेळी अरविंद याने घरातील चाकूने संदिपवर वार केला. हा वार वर्मी बसल्याने रक्तस्राव होऊन यात संदीपचा मृत्यू झाला.

या घटनेनंतर आडगाव पोलीस ठाण्याचे वरिष्ठ निरीक्षक उमेश पाटील यांनी आपल्या कर्मचाऱ्यांसह घटनास्थळी धाव घेत संदीपला जिल्हा रुग्नालयात दाखल केला असता डॉक्टरांनी त्याला तपासून मयत घोषित केले. याबाबत आडगाव पोलीस ठाण्यात गुन्हा दाखल करण्यात आला असून, संशयित आरोपी अरविंद गायकवाड याला पोलिसांनी अटक केली आहे.