नागपूरमध्ये गरोदर महिलेची हत्या करून तिला रस्त्याच्या कडेला फेकले असल्याची संतापजनक घटना घडली आहे. या घटनेने शहरातील नागरिकांच्या पायाखालची जमीन सरकली आहे. धक्कदायक म्हणजे या महिलेची हत्या होऊन २ दिवस उलटून गेले आहेत. नागपूर पोलीस आणि हितजोती आधार फाउंडेशनच्या सहकार्याने या मृत महिलेवर अंतिम संस्कार करण्यात आले.

मिळलेल्या माहितीनुसार, नागपूर जिल्ह्यातील सावनेर पोलीस स्टेशन हद्दीच्या पाटणसावंगी पोलीस चौकी अंतर्गत सावरमेंढा शिवारात एका अज्ञात महिलेचा मृतदेह कुजलेल्या अवस्थेत आढळून आला. धक्कदायक म्हणजे ही महिला आठ महिन्यांची गरोदर होती. या महिलेची हत्या करून रस्त्याच्या कडेला असलेल्या झुडपात फेकून देण्यात आले होते. मात्र मृतदेह कुजून त्याची दुर्गंधी सुटल्याने आजूबाजूच्या नागरिकांचा संशय बळावला. त्यांनी आजूबाजूला पहिले असता त्यांना झुडपात महिलेचा मृतदेह आढळला.

क्षणाचाही विलंब न करता स्थानिकांनी पोलिसांना कळवले. स्थानिकांच्या माहितीनुसार नागपूर पोलीस आणि फॉरेन्सिक टीम घटनास्थळी दाखल झाले. तसेच नागपूर येथील अपघातग्रस्तांच्या मदतीसाठी धावून जाणारी आधार फाउंडेशन टीम देखील घटनास्थळी पोचली. महिलेचा मृतदेह ताब्यात घेऊन पंचनामा करत शवविच्छेदन करण्यात आले.

पोलिसांनी दिलेल्या माहितीनुसार, संबंधित महिलेची हत्या गळा दाबून करण्यात आली आहे. तसेच ही हत्या होऊन दोन दिवस उलटले आहेत. मृतदेहाची अद्यापही ओळख न पटली नसून या महिलेवर हितजोती आधार फाउंडेशनच्या सहकार्याने पोलिसांनी अंतिम संस्कार केले. दरम्यान मृतदेहाची ओळख न पटल्याने नेमका ही महिला आहे तरी कोण? हे नागपूर पोलिसांसमोर मोठे आवाहन ठरले आहे. तसेच या महिलेची हत्या का व कोणी केली ? याचा तपास नागपूर पोलीस करत आहे.