मेरठमधील सौरभ राजपूत हत्याकांडाची देशभरात चर्चा होत आहे. दररोज या प्रकरणातील नवनवीन खुलासे होत आहेत. याच दरम्यान एक सीसीटीव्ही फुटेज समोर आले आहे, या फुटेजमध्ये सौरभ राजपूत शेवटचा जिवंत दिसत आहे. हे फुटेज ३ मार्च रात्री ११.४९ वाजताचे असल्याचे म्हटले जात आहे. या व्हिडीओमध्ये सौरभ त्याच्या मित्रासोबत बाईकवरुन घरी परत असल्याचे दिसते.

सीसीटीव्ही फुटेजमध्ये सौरभ राजपूत बाईकवर बसून घरी जेवण घेऊन जात असल्याची माहिती समोर आली आहे. याच जेवणामध्ये त्याच्या बायकोने, मुस्कानने गुंगीचे औषध मिसळले होते. या जेवणामुळे सौरभ बेशुद्ध पडला. त्यानंतर मुस्कानने बॉयफ्रेंड साहिल शुक्लासोबत मिळून सौरभची निर्घृण हत्या केली. त्याच्या मृतदेहाचे १५ तुकडे करुन एका प्लास्टिकच्या ड्रममध्ये टाकले.

दरम्यान समोर आलेल्या सीसीटीव्ही फुटेजमध्ये सौरभसोबत असलेल्या बाईकवरील दुसऱ्या व्यक्तीची ओळख अद्याप पटली नसल्याचे म्हटले जात आहे. पोलीस सौरभच्या घराजवळील परिसरातील इतर सीसीटीव्ही फुटेज मिळवण्याचा प्रयत्न करत आहेत. या हत्याकांडामध्ये सामील असलेल्या इतर व्यक्तींचा शोध घेण्यासाठी पोलीस तपास करत आहेत.

सौरभ राजपूत हत्याकांडातील आरोपी मुस्कान रस्तोगी आणि साहिल शुक्ला मेरठच्या चौधरी चरणसिंह जिल्हा कारागृहात बंद आहेत. दोघांची स्थिती दिवसेंदिवस बिघडत आहे. कारागृह प्रशासनाकडे ते अंमली पदार्थांची मागणी करत आहेत. अंमली पदार्थ मिळत नसल्याने त्यांनी अन्नपाणी सोडल्याचे समोर आले आहे.