संघर्ष गांगुर्डे, कल्याण

दिवाळी सणाच्या उत्सवात कल्याणमध्ये मिठाचा खडा पडल्याचे समोर आले आहे. फटाके फोडण्याच्या शुल्लक कारणांवरुन दोन गटांमध्ये मोठा राडा झाला. या घटनेत तरुण गंभीर जखमी झाले आहेत. पोलिसांनी या तरुणांविरोधात गुन्हा दाखल केला असून परिसरात चिंतेचे वातावरण निर्माण झाले आहे.

मिळालेल्या माहितीनुसार, कल्याणच्या चिकणघर परिसरात काल उशिरा रात्री दोन गटांमध्ये मोठा राडा झाला. फटाके फोडण्यास विरोध केल्याने हा वाद झाल्याचे समोर आले आहे. हा वाद इतका वाढला की, या दोन गटात तुंबळ हाणामारी झाली. या झटापटीत काही जणांनी एकमेकांवर बाजू;ला असलेल्या कुंड्या फोडल्या. या मारामारीत काही तरुण गंभीर जखमी झाले.

घटनेची माहिती मिळताच महात्मा फुले पोलीस ठाण्याचे पथक घटनास्थळी दाखल झाले. घटनास्थळी पोलिसांनी पोहचून दोन्ही गटातील वाद सोडवला. पोलिसांनी दोन्ही गटांना ताब्यात घेऊन परिस्थिती नियंत्रणात आणली. या प्रकरणी परस्परविरोधी गुन्हे दाखल करण्यात आले असून पोलिसांकडून पुढील तपास सुरू आहे.

कल्याणामध्ये दिवाळी सणाचा आनंद हिंसाचारात बदलल्याच्या अनेक घटना मागील दोन तीन दिवसात समोर आल्या असून नागरिकांनी संयम बाळगण्याचे आणि शांततेत सण साजरा करण्याचे आवाहन पोलिसांकडून करण्यात येत आहे. दरम्यान या घटनेने परिसरात गोंधळाचे वातावरण निर्माण झाले आहे.