• जळगावच्या जामनेरमध्ये भयंकर घटना

• ३० वर्षीय विवाहित महिलेवर सामूहिक बलात्कार

• ६ जणांविरोधात गुन्हा दाखल करण्यात आला

• अपहरण, मारहाण, सामूहिक लैंगिक अत्याचार आणि धमकीचे आरोप

संजय महाजन, जळगाव

जळगावमध्ये ३० वर्षीय विवाहितेवर ६ जणांनी सामूहिक बलात्कार करण्यात आल्याची धक्कादायक घटना समोर आली आहे. जळगावच्या जामनेर तालुक्यात ही घटना उघडकीस आली. आरोपींनी पीडित महिलेचे अपहरण केलं, नंतर मारहाण करत तिच्यासोबत भयंकर कृत्य केले. या घटनेमुळे जळगाव जिल्हा हादरला आहे. पीडित महिलेच्या तक्रारीवरुन पोलिसांनी या प्रकरणी गुन्हा दाखल करत तपास सुरू केला आहे.

मिळालेल्या माहितीनुसार, जळगावच्या जामनेरमध्ये ४ जणांनी विवाहितेवर सामूहिक बलात्कार केला. महिला रस्त्याने पायी चालत जात होती. त्यावेळी दोन आरोपींनी तिला जबरदस्ती आपल्या कारमध्ये बसवून जवळच्या ओढ्याजवळ नेले. त्याठिकाणी ६ जणांनी महिलेवर आळीपाळीने बलात्कार केला. घटनेचा व्हिडीओ तयार करून आरोपींनी तिला धमकी दिली. यावेळी आरोपींनी पीडित महिलेला मारहाण करत जीवे मारण्याची देखील धमकी दिली.

या प्रकरणी फत्तेपूर पोलिस ठाण्यात ६ जणांविरुद्ध सामूहिक बलात्कार, अपहरण, दुखापत, धमकी तसेच शस्त्रास्त्र कायद्यांतर्गत विविध कलमानुसार गुन्हा दाखल करण्यात आला आहे. पीडितेला भीती दाखवून अत्याचार केल्याचा आरोप देखील पीडित महिलेने तक्रारीत नमूद आहे. अत्याचाराचा व्हिडिओही व्हायरल करण्याची धमकी देत वर्षभरापासून आरोपींनी वेळोवेळी अत्याचार केल्याचा आरोप पीडितेने केला आहे.

पीडित महिला आणि आरोपी हे गेल्या अनेक वर्षांपासून एकमेकांना ओळखतात. आरोपींपैकी एकाचा ट्रॅक्टर भाड्याने देण्याचा व्यवसाय आहे. पीडितेच्या नवऱ्याकडे ट्रॅक्टरच्या भाड्याने १ लाख रुपये थकीत असल्याची माहिती समोर आली आहे. पोलिस सध्या या प्रकरणाचा कसून तपास करत आहेत. आरोपींचा शोध घेतला जात आहे. दरम्यान, २० दिवसांतील जामनेर तालुक्यातील महिलेवर अत्याचाराची दुसरी घटना असून जिल्ह्यात मोठी खळबळ उडाली आहे.