चंद्रपूर जिल्ह्यात धक्कादायक घटना घडली आहे. एमआयएमच्या नगरसेवकावर १५ ते १६ जणांनी जीवघेणा हल्ला केलाय. या हल्ल्यात नगरसेवक गंभीर जखमी झालेत. सध्या त्यांच्यावर रुग्णालयात उपचार सुरू आहेत. अझहर शेख असं एमआयएमच्या नगरसेवकाचं नाव आहे. ते चंद्रपूर महानगरपालिकेतील एकमेव एमआयएमचे नगरसेवक आहेत. त्य शनिवारी रात्री उशिरा त्यांच्यावर हल्ला झाला.

नेमकं प्रकरण काय ?

चंद्रपूर महानगरपालिकेतील एमआयएमचे नगरसेवक अजहर शेख यांच्यावर प्राणघातक हल्ला झाला होता. या हल्ल्यानंतर त्यांना जिल्हा सामान्य रुग्णालयातील अतिदक्षता विभागात दाखल करण्यात आलंय. शनिवारी रात्री उशिरा शेख हे आपल्या बिर्याणी हॉटेलसमोर उभे होते. त्यावेळी तेथे १५ ते १६ काँग्रेस कार्यकर्त्यांनी त्यांना जबर मारहाण केली, असा आरोप शेख यांनी केला. यातून अजहर शेख यांनी आपला कसाबसा जीव वाचवला.

शेख यांचं चंद्रपूर शहरातील मुख्य भागात जटपुरा गेट येथे बिर्याणी हॉटेल आहे. हल्ल्याची घटना तेथील एका सीसीटीव्हीत कैद झाली आहे. पोलिसांनी फुटेज ताब्यात घेतलं आहे. अजहर शेख नगरसेवक असलेल्या रहमतनगर भागात एमआयएम आणि काँग्रेस पक्षातील वर्चस्वाच्या वादातून हा हल्ला झाल्याची प्राथमिक माहिती आहे.

अजहर शेख हे रहमतनगर भागातून नगरसेवक असून याच भागातील काँग्रेस नगरसेविका सोफिया तवंगर यांचे नातेवाईक आणि सोहेल रजा यांनी मारहाण केल्याचा अझहर शेख यांचा आरोप आहे. आपल्या चांगल्या कामाची धास्ती विरोधकांना असल्यानं आपल्यावर हल्ला झाल्याचं शेख यांनी सांगितलं.