Shocking : १९ वर्षीय विद्यार्थिनीचा लैंगिक छळ केल्याप्रकरणी एका खासगी विद्यापीठातील ४५ वर्षीय प्राध्यापकाला अटक करण्यात आली आहे. प्राध्यापकाने फसवून घरी बोलावून अत्याचार केल्याचा आरोप पीडित तरुणीने केला आहे. तिच्या तक्रारीवरुन प्राध्यापकावर भारतीय न्याय संहितेच्या कलम ७५ (लैंगिक छळ) अंतर्गत गुन्हा दाखल करण्यात आला आहे. ही संपूर्ण घटना बंगळुरूमध्ये घडली आहे.

पीडित तरुणी ही बीसीएच्या तिसऱ्या वर्षात शिकत आहे. तिने टिळकनगर पोलीस स्थानकात तक्रार दाखल केली आहे. 'त्याने (प्राध्यापकाने) २५ सप्टेंबर रोजी पीडितेला घरी जेवण्यासाठी आमंत्रित केले. माझी पत्नी आणि मुले घरी असतील असा दावा त्याने केला. बाकीचे लोक असल्याने त्याचा प्रस्ताव मान्य केला. त्याने माझ्या आईशीही बोलून तिला माझ्यासोबत येण्यास सांगितले. त्याची पत्नी आणि मुले घरीच आहेत असे समजून माझ्या आईने मला त्याच्यासोबत जाण्यास सांगितले', असे पीडितेने पोलिसांना सांगितले.

'घराजवळ गेल्यावर स्कूटर पार्क करताना घरी कोणीही नाहीये असे त्याने मला सांगितले. मी तेव्हा संकोच केला, मी त्याच्यासोबत सुरक्षित आहे असे त्याने मला आश्वासन दिले. त्याच्या घरातील सोफ्यावर मी जाऊन बसले. तो माझ्या शेजारी येऊन बसला. मला वैयक्तिक प्रश्न विचारु लागला. त्याने मला माझ्या बॉयफ्रेंडशी संबंध तोडण्यास सांगितले', अशी माहिती पीडितेने दिली.

पीडित विद्यार्थिनी म्हणाली, 'त्याने मला त्याच्या घराच्या शेजारी असलेल्या पीजीमध्ये राहायला सांगितले, जेणेकरून मी शंका विचारण्यासाठी त्याच्या घरी नियमितपणे जाऊ शकेन. परीक्षेतील गुण, पैसे अशा अनेक बाबींमध्ये मदत करेन असे त्याने मला सांगितले. त्याने मला चुकीच्या पद्धतीने स्पर्श केला. यादरम्यान माझ्या मित्राचा फोन आला. मी सरांच्या घरी आहे, असे माझ्या मित्राला फोनवर सांगितले. तेव्हा मी तुझी परीक्षा घेत होतो असे त्याने मला सांगितले. शेवटी ही गोष्ट कोणालाही सांगू नकोस असेही म्हटले. या प्रकरणी पोलिसांनी प्राध्यापकाला अटक केली आहे.