अकोल्यात पुन्हा एकदा धक्कादायक घटना घडली असून शहरातील कायदा व सुव्यवस्थेवर प्रश्नचिन्ह निर्माण झाले आहे. जुन्या शहरातील डाबकी रोड परिसरात एका १६ वर्षीय अल्पवयीन मुलीवर चाकूचा धाक दाखवत अत्याचार झाल्याची घटना उघड झाली आहे. तौहिद समीर बैद या तरुणावर हा गंभीर आरोप करण्यात आला आहे. या घटनेनंतर संपूर्ण अकोला हादरले असून परिसरात मोठी खळबळ उडाली आहे.

मिळालेल्या माहितीनुसार, आरोपीने पीडित मुलीला एकटं पाहून तिला धमकावत चाकू दाखवला आणि तिच्यावर अत्याचार केला. या घटनेची माहिती मिळताच पीडित मुलीच्या कुटुंबीयांनी पोलिसांकडे धाव घेतली. घटनेनंतर बजरंग दलचे कार्यकर्ते पोलिस ठाण्यात मोठ्या संख्येने जमा झाले होते. त्यांनी आरोपीवर कठोर कारवाईची मागणी करत पोलिस प्रशासनाला घेराव घातला.

या प्रकरणात भाजप आमदार रणधीर सावरकर यांनी पोलिस ठाण्यात जाऊन संबंधित अधिकाऱ्यांना आरोपीवर तात्काळ कठोर कारवाई करण्याची मागणी केली. त्यानंतर काँग्रेसचे आमदार साजिद खान पठाण यांनीदेखील पोलिस ठाण्यात भेट देऊन घटनेबाबत संताप व्यक्त केला.

या प्रकरणी अकोला पोलिसांनी तत्काळ कारवाई करत आरोपीविरुद्ध पोस्को कायद्यांतर्गत तसेच विविध गंभीर कलमान्वये गुन्हा दाखल केला आहे. तरीदेखील आरोपी अद्याप मोकाट असून त्याच्या अटकेसाठी पोलिसांनी दोन विशेष पथके रवाना केली आहेत.

घटनेमुळे डाबकी रोड परिसरातील नागरिकांमध्ये भीतीचे वातावरण निर्माण झाले आहे. विशेषतः मुलींच्या सुरक्षेचा प्रश्न पुन्हा ऐरणीवर आला आहे. पालक आपल्या मुलींबाबत अत्यंत चिंतेत असून नागरिक पोलिस प्रशासनावर नाराजी व्यक्त करत आहेत. दरम्यान, शहरातील कार्यकर्त्यांनी आरोपीला कठोर शिक्षा होण्याची मागणी करत निषेध नोंदवला आहे. आता या प्रकरणात आरोपीच्या अटकेनंतर पुढील कारवाई काय होते याकडे सर्वांचे लक्ष लागले आहे.