Akola News : भाविकांवर काळाचा घाला, भरधाव ट्रकची ट्रॅक्टरला धडक; दोघांचा जागीच मृत्यू, ८ जण गंभीर

अकोला जिल्ह्यातून एक हृदयद्रावक घटना समोर आली आहे. उत्तर प्रदेशातील देवकुंड येथून गंगाजल घेऊन परतीच्या प्रवासात असलेल्या कावड यात्रेतील भाविकांच्या गटावर भीषण अपघातात काळाने झडप घातली. रात्रीच्या सुमारास शिवनी परिसरात कावड यात्रेमागून येणाऱ्या रेतीने भरलेल्या ट्रकने ट्रॅक्टरला जोरदार धडक दिली. त्यामुळे ट्रॅक्टर पलटी होऊन थेट भाविकांच्या अंगावर उलटला. या अपघातात दोन भाविकांचा दुर्दैवी मृत्यू झाला असून सात ते आठ भाविक गंभीर जखमी झाले आहेत.

या अपघातात बंडू पांडुरंग बंड आणि अविनाश पोहरे यांचा जागीच मृत्यू झाल्याची प्राथमिक माहिती आहे. मृत आणि जखमी भाविक हे अकोल्यातील पातूर शहरातील असल्याचे समजते. जय तपे हनुमान व्यायाम शाळेच्या वतीने ही कावड यात्रा काशी विश्वनाथ अर्थात देवकुंड येथून गंगाजल आणण्यासाठी निघाली होती. यात्रेनंतर गंगेचे पाणी घेऊन परत येत असताना हा अपघात घडल्याने साऱ्या गावात शोककळा पसरली आहे.

अपघातानंतर तातडीने मदतकार्य सुरू करण्यात आले असून जखमींना जवळच्या रुग्णालयात दाखल करण्यात आले आहे. काहींची प्रकृती चिंताजनक असल्याचे डॉक्टरांनी सांगितले आहे. सध्या पोलिसांनी घटनास्थळी पंचनामा केला असून ट्रकचालकाविरोधात गुन्हा दाखल करण्याची प्रक्रिया सुरू आहे. या दुर्घटनेने पातूर शहरात शोककळा पसरली असून गावकरी आणि नातेवाईक हळहळ व्यक्त करत आहेत. एक धार्मिक आणि श्रद्धेचा प्रवास दुर्दैवाने अशा दुर्घटनेत संपल्याने अनेकांच्या डोळ्यांत अश्रू आले आहेत.