Maharashtra News Live Update: नवतपाच्या पहिल्याच दिवशी विदर्भ होरपळला , ब्रह्मपुरीचा पारा तब्बल ४७.६ अंशांवर

छत्रपती संभाजीनगर जिल्ह्यातील गंगापूर कृषी उत्पन्न बाजार समितीत मोठ्या कष्टाने पिकवलेल्या कांद्याला कवडीमोल भाव मिळाल्याने शेतकऱ्यांचा संताप अनावर झाला. संतप्त झालेल्या शेतकऱ्यांनी विक्रीसाठी आणलेला कांदा सोमवारी सायंकाळी ६ वाजता थेट बाजार समितीसमोर गंगापूर-वैजापूर मुख्य रस्त्यावर फेकून देत 'रास्ता रोको' आंदोलन केले. या आंदोलनामुळे महामार्गावरील वाहतूक काही काळ पूर्णपणे ठप्प झाली होती.

चिखली शहर व तालुक्यात पेट्रोल-डिझेल टंचाईच्या पार्श्वभूमीवर आमदार श्वेता महाले यांच्या उपस्थितीत प्रशासकीय अधिकारी आणि पेट्रोल पंप मालकांची महत्त्वाची बैठक पार पडली. बैठकीत इंधन पुरवठ्यातील अडचणींसह सुरू असलेल्या काळ्याबाजारावर तीव्र चिंता व्यक्त करण्यात आली. आमदार महाले यांनी अवैध साठवणूक व काळाबाजार करणाऱ्यांवर कडक कारवाईचा इशारा देत प्रशासनाकडून ‘फिरते पथक’ तयार करण्यात आल्याची माहिती दिली. शेतकरी, रुग्णवाहिका व अत्यावश्यक वैद्यकीय सेवांना इंधन पुरवठा प्राधान्याने केला जाईल, असेही त्यांनी स्पष्ट केले. तसेच नागरिकांनी अवैध विक्री किंवा साठवणुकीची माहिती थेट प्रशासन किंवा स्वतः त्यांच्याकडे देण्याचे आवाहन करण्यात आले आहे.

तुटवड्यानंतर झालेल्या दरवाढीचा परिणाम आता शहरातील हॉटेल व्यवसायावर स्पष्टपणे दिसू लागला आहे. स्वयंपाकासाठी लागणाऱ्या गॅसपासून ते कच्च्या मालाच्या वाहतुकीपर्यंत विविध घटकांच्या खर्चात वाढ झाल्याने अनेक हॉटेलचालकांनी मेनूचे दर वाढविले आहेत. गेल्या काही दिवसांत अनेक हॉटेलांमध्ये खाद्यपदार्थांचे दर १० ते १५ टक्क्यांनी वाढले आहेत.

हांडेवाडी रस्त्यावरील सातवनगर परिसरात मोटारीतून आणि झाडाझुडपांमध्ये लपवून ठेवलेला अडीच हजार लिटर गावठी हातभट्टी दारूचा साठा पोलिसांनी जप्त केला.

काळेपडळ पोलिसांनी ही कारवाई केली.

या प्रकरणी पोलिसांनी एका ५० वर्षीय व्यक्तीला अटक केली आहे.सुनील हरी कचरावत (रा. सातवनगर, हांडेवाडी रस्ता) असे अटक केलेल्या आरोपीचे नाव आहे.