जळगावमध्ये २१ वर्षांच्या तरुणाला टोळक्यांनी अमानुष मारहाण करत त्याची हत्या करण्यात आली. जळगावच्या जामनेर शहरात ही घटना घडली. सुलेमान रहीम खान (२१ वर्षे) असं हत्या करण्यात आलेल्या तरुणाचे नाव आहे. सोमवारी रात्री ९ वाजताच्या सुमारास ही घटना घडली होती. या घटनेमुळे जळगावमध्ये तणावाचे वातावरण आहे.

जळगावचे एसपी महेश्वर रेड्डी यांनी दिलेल्या माहितीनुसार, २१ वर्षीय सुलेमान खानचे १७ वर्षीय मुलीसोबत प्रेमसंबंध होते. याच कारणावरून त्याला मारहाण करत हत्या करण्यात आली. या प्रकरणी ४ जणांना अटक करण्यात आली आहे. तर इतर ५ आरोपी सध्या फरार असून आम्ही त्यांचा शोध घेत आहोत.' जळगाव पोलिसांनी सांगितले की, सुलेमान खान वडीलांना शेतीच्या कामामध्ये मदत करायचा. तो काही कामानिमित्त गावापासून २० किलोमीटर अंतरावर असलेल्या जामनेर येथे आला होता. जामनेरमधील एका कॅफेमध्ये तो मुलीसोबत बसला होता. त्याचवेळी काही जणांनी या दोघांना पकडले. त्यानंतर त्यांनी सुलेमानवर हल्ला करत त्याला बेदम मारहाण केली.

सुलेमान कसा तरी त्यांच्या तावडीतून सुटला आणि तो आपल्या गावाकडे निघाला. आरोपींनी त्याचा पाठलाग केला. बस स्टॉपवर थांबलेल्या सुलेमानला गाठत आरोपींनी परत लाठ्याकाठ्या आणि लोखंडी रॉडने बेदम मारहाण केली. या मारहाणीत सुलेमान गंभीर जखमी झाला. सुलेमानला रुग्णालयात उपचारासाठी नेण्यात आले. पण उपचारापूर्वीच त्याचा मृत्यू झाला.

या घटनेनंतर जळगावमध्ये खळबळ उडाली.सुलेमानच्या कुटुंबीयांना आणि नातेवाईकांनी मोठ्यासंख्यने जामनेर पोलिस ठाण्याबाहेर मोठी गर्दी केली आणि न्याय मिळावा अशी मागणी केली. आरोपींना तात्काळ अटक करावी अशी मागणी नागरिकांनी केली. जर आरोपींवर तात्काळ कारवाई केली नाही तर आम्ही रस्त्यावर उतरू असे नागरिकांनी सांगितले. परिस्थिती आणखी चिघळू नये यासाठी जामनेरमध्ये पोलिसांचा कडक बंदोबस्त तैनात करण्यात आला आहे.