यूपीएससी परीक्षेचा निकाल लागला आहे. यूपीएससी परीक्षेत मालविका जी नायरने ४५ रँक मिळवली आहे. मालविका यांनी एकदा दोनदा नव्हे तर तीन वेळा यूपीएससी परीक्षा क्रॅक केली आहे. मालविकाचा प्रवास फक्त तरुण पिढी नव्हे तर सर्व आईंनादेखील प्रेरित करणारा आहे. आई झाल्यानंतर १७ दिवसांतच त्यांनी यूपीएससी मेन्स परीक्षा दिली आहे.

मालविका जी नायर (Malvika G Nair) या मूळच्या केरळच्या रहिवासी आहेत. त्यांनी याआधी दोनदा यूपीएससी परीक्षा क्रॅक केली होती. त्या आयआरएस ऑफिसर म्हणून कार्यरत आहेत. त्या सध्या चाइल्ड केअर लिव्ह म्हणजेच सुट्टीवर आहेत. त्यांचे पतीदेखील आयपीएस ऑफिसर आहेत.

मालविका जी नायर यांनी आपले पती आणि कुटुंबाच्या मदतीने हे यश मिळवलं आहे. त्यांनी बाळाला जन्म दिल्यानंतर १७ व्या दिवशीच यूपीएससी (UPSC) परीक्षा दिली आणि त्यात यशदेखील मिळवले. त्या लवकरच आयएएस ट्रेनिंग पूर्ण करतील आणि कार्यरत होतील.

मालविका जी नायर या मूळच्या अलाप्पुझा जिल्ह्यातील चेंगन्नूरच्या रहिवासी आहेत. त्या याआधी अधिकारी म्हणून कार्यरत होत्या. परंतु त्यांचे आयएएस होण्याचे स्वप्न होते. आयएएस होण्यासाठी यूपीएससी परीक्षा देण्याचा हा त्यांचा शेवटचा प्रयत्न होता. त्यांनी या संधीचं सोनं केलं.

यूपीएससीच्या मेन्स परीक्षेच्या काळात त्या प्रेग्नंट होत्या. त्यांनी ३ सप्टेंबर २०२४ रोजी मुलाला जन्म दिला अन् २० सप्टेंबर रोजी त्यांनी यूपीएससी मेन्स परीक्षादेखील दिली. प्रेग्नंट असतानाही त्यांनी यूपीएससी परीक्षेचा अभ्यास केला आणि त्यांना यशदेखील मिळाले.