राज्यात सोन्यासह चांदीमध्ये गुंतवणूक करण्याचे प्रमाण दिवसेंदिवस वाढत आहे. अशात महागाईचा भडका उडाला असून सध्या चांदीचा भाव ९०,००० रुपये प्रति किलोच्या पुढे पोहचला आहे. विश्लेषक आणि अभ्यासकांनी यावर असं म्हटलं आहे की, चांदी दिवाळीपर्यंत १ लाख रुपये पार करू शकते.

शुक्रवारी २० सप्टेंबर रोजी चांदीचा भाव ३१ डॉलर प्रति किलो इतका होता. हा भाव आणखी वाढून थेट १ लाख रुपये प्रति किलो होऊ शकतो अशी शक्यता वर्तवण्यात आली आहे. जानकारांनी दिलेल्या माहितीनुसार, सोलर पॅनल आणि इलेक्ट्रिक वाहनांचा वापर वाढल्याने चांदीची मागणी सुद्धा मोठ्याप्रमाणात वाढली आहे. सध्या भारतात प्रति किलो चांदी ९० हजार रुपयांना विकली जातीये. शुक्रवारी MCX वर चांदी महागली असून ही किंमत थेट ९०,३०० रुपये प्रति किलोवर आहे.

ऑगस्ट महिन्यात भारतात ११,००० करोड रुपयांची चांदी इंपोर्ट करण्यात आली. तसेच गेल्या वर्षी ऑगस्टमध्ये १,३०० कोटींची चांदी इंपोर्ट करण्यात आली होती. यावरून भारतात चांदीची मागणी वाढल्याचे लक्षात येते.

गेल्या काही दिवसांत चांदीच्या दरात झालेले बदल

सीमा शुल्क कपातीची घोषणा केल्यानंतर चांदीचा भाव कमी झाला होता. १२ सप्टेंबरला चांदी ८६,५०० रुपये प्रति किलो होती. त्यानंतर १३ तारखेला भाव तब्बल ३ हजार रुपयांनी वाढला आणि चांदी ८९,५०० रुपयांवर पोहचली. १४ तारखेला दुसऱ्या दिवशी भाव आणखी २ हजार ५०० रुपयांनी वाढला होता. त्यावेळी चांदीचा भाव ९२,००० रुपयांवर पोहचला. १६ सप्टेंबरपर्यंत भाव आणखी वाढून ९३,००० रुपये झाला. १७ आणि १८ तारखेला पुन्हा भाव १ हजार रुपयांनी कमी झाला. त्यानंतर पुन्हा वाढ होऊन आज चांदीची किंमत ९३,००० रुपये प्रति किलो आहे.

सोनं १ लाख रुपये तोळा होणार?

चांदी बरबोरच सोन्याचा भाव सुद्धा असाच महागण्याची शक्यता आहे. त्यामुळे सोन्याचा दर दिवाळीपर्यंत किंवा दिवाळीनंतर १ लाख रुपये तोळा होऊ शकतो असं काही अभ्यासकांनी म्हटलं आहे. दिवळी नंतर सर्वत्र लग्नसराईला सुरुवात होते. लग्नसराई म्हटलं की सोन्याचे दागिने घ्यावेच लागतात. अशात ऐन लग्न सराइत सोनं महागल्यास सामान्य नागरिकांना दागिने बनवणे फार कठीण होणार आहे.