रिझर्व्ह बँक ऑफ इंडियाने रेपो रेटमध्ये कपात केली. रेपो रेटमध्ये कपात केल्यानंतर अनेक बँकांनी कर्जावरील व्याजदर कमी केले. आता स्टेट बँक ऑफ इंडियानेदेखील व्याजदरात कपात करण्याचा निर्णय घेतला आहे. स्टेट बँक ऑफ इंडियाने व्याजदरात २५ बेसिस पॉइंट्सने कपात केली आहे.

५ डिसेंबर रोजी आरबीआयने रेपो रेट २५ बेसिस पॉइंट्सने कमी करुन ५.२५ टक्क्यांवर आणले. यानंतर बँक ऑफ इंडिया, बँक ऑफ बडोदाने व्याजदर कमी केले. त्यानंतर आता देशातील सर्वात मोठी बँक स्टेट बँकेनेही कर्जदारांना दिलासा दिली आहे.

स्टेट बँकेने एक्सटर्नल बेंच मार्क लिंक्ड रेट २५ बेसिस पॉइंट्सने कमी केला आहे. हा दर आता ७.९० टक्क्यांवर आला आहे. स्टेट बँकेने मार्जिनल कॉस्ट ऑफ फंड्स बेस्ड लेंडिग रेटमध्येही कपात केली आहे. हे दर ५ बेसिस पॉइंट्सने कमी केले आहे. त्यामुळे हे दर ८.७५ टक्क्यांवरुन ८.७० टक्क्यांवर आले आहे.

बँकेचे हे नवीन दर १५ डिसेंबरपासून लागू केले जाणार आहे.स्टेट बँकेने बेस रेट आणि बीपीएलआर १० टक्क्यांवरुन ९.९० टक्के केला आहे. तसेच एफडीवरील व्याजदरात कपात केली आहे. २ ते ३ वर्षांच्या ठेवीसाठी व्याजदरात कपात केली आहे.

चौथ्यांदा रेपो रेट कमी (Repo Rate Decrease for Fourth Time)

रिझर्व्ह बँक ऑफ इंडियाने या वर्षभरात रेपो रेटमध्ये १२५ बेसिस पॉइंट्सने कपात केली. मागच्या आठवड्यात चौथ्यांदा रेपो रेट कमी केला आहे. रिझर्व्ह बँकेची दर दोन महिन्यांनी पतधोरण बैठक होते. सुरुवातीला दोनदा रेपो रेटमध्ये कपात केली. यानंतर तिसऱ्यांना ५० बेसिस पॉइंट्सने कपात केली.

गृह कर्जदारांना दिलासा

रिझर्व्ह बँकेच्या रेपो रेटमध्ये कपात केल्यानंतर स्टेट बँकेनेही महत्त्वाचा निर्णय घेतला आहे. यामुळे गृह कर्जदारांना दिलासा मिळाला आहे. त्यांचा कर्जावरील ईएमआय कमी होणार आहे. यामुळे सर्वसामान्यांना दिलासा मिळणार आहे.

किती पैसे वाचणार

५० लाखांच्या होम लोनवर २० वर्षांच्या कालावधीसाठी याआधी ८.१५ टक्के व्याजदर द्यावे लागत होते. आता हे दर ७.९० टक्के झाले. जुन्या व्याजदरानुसार ईएमआय ४२,२९० रुपये दर महिन्याला येत होता. आता तुम्हाला फक्त ४१,५११ रुपये ईएमआय भरावा लागणार आहे. तुमचे ७७९ रुपये वाचणार आहेत.