रिझर्व्ह बँकेने सर्वसामान्यांना दिलासा दिला आहे. रिझर्व्ह बँकेने रेपो रेट कमी करण्याचा निर्णय घेतला आहे. रेपो रेटमध्ये ०.२५ टक्क्यांनी कपात केली आहे. रेपो रेट (Repo Rate) आता ६ टक्के झाला आहे. त्यामुळे आता कर्जाचा हप्ता कमी होणार आहे. आज पतधोरण बैठकीत हा निर्णय घेतला आहे. रिझर्व्ह बँकेचे गव्हर्नर संजय मल्होत्रा यांनी ही माहिती दिली आहे.

RBI चे गव्हर्नर संजय मल्होत्रा काय म्हणाले?

अर्थव्यवस्थेला चालना देण्यासाठी आणि महागाई नियंत्रणात ठेवण्यासाठी रेपो रेटमध्ये कपात करण्याचा निर्णय घेण्यात आल्याचे आरबीआय गव्हर्नर संजय मल्होत्रा यांनी सांगितले. ते म्हणाले की, सध्याच्या जागतिक आर्थिक परिस्थितीचा विचार करता, बाजारात गुंतवणूक वाढवणे हा या कपातीमागील मुख्य उद्देश आहे. या निर्णयामुळे उद्योग क्षेत्राला दिलासा मिळेल. ग्राहकांसाठी कर्ज स्वस्त होऊन खरेदीला प्रोत्साहन मिळेल. सर्वसामान्य नागरिकांना याचा फायदा होईल, परंतु महागाईवर नियंत्रण ठेवण्यासाठी आरबीआय पुढील काळातही सतर्क राहील. दरम्यान, रेपोट रेटमध्ये कपात केल्यानंतर बँका त्यांच्या कर्ज व्याजदरात लवकरच बदल करू शकतात, असे तज्ज्ञांचे मत आहे.

टॅरिफबाबत काय म्हणाले संजय मल्होत्रा?

सध्या अमेरिकेने भारतावर २६ टक्के टॅरिफ लागू केला आहे. याबाबतही संजय मल्होत्राने माहिती दिली आहे. जास्त टॅरिफमुळे देशाच्या निर्यातीवर नकारात्मक परिणाम होऊ शकतो.टॅरिफमुळे निर्माण झालेले अनिश्चितता देशाच्या विकासाच्या दरावर मर्यादा आणू शकते. यामुळे जागतिक अर्थव्यवस्थेच्या वाढीवरील परिणाम देशाच्या आर्थिक वाढीलाही अडथळा आणू शकते, असं त्यांनी सांगितलं.

रेपो रेटमध्ये कपात केल्याने कर्जाचा हप्ता किती होणार कमी?

रिझर्व्ह बँकेच्या रेपो रेटवर बँकांच्या लोनचा हप्ता ठरवला जातो. जर रेपो रेटमध्ये कपात झाली तर कर्जाचा हप्ता आपोआप कमी होतो. तीन महिन्यांपूर्वी पतधोरण बैठकीतदेखील रेपो रेटमध्ये कपात करण्यात आली होती. रेपो रेट ६.२५ टक्के झाला होता. दरम्यान, आता या रेपो रेटमध्ये आणखी कपात झाली आहे. त्यामुळे सर्वसामान्यांना दिलासा मिळाला आहे. आता रेपो रेट ०.२५ टक्क्यांनी कमी झाले आहे. त्यानुसार बँका आपल्या लोनवरील व्याजदर कमी करतील. प्रत्येक बँकेचे व्याजदर हे वेगवेगळे असते. त्यानुसार तुमचा ईएमआय कमी होणार आहे.