• एलपीजी सिलिंडरच्या नियमामध्ये पुन्हा मोठा बदल

• ग्रामीण भागात गॅस सिलिंडर घरपोच सेवा सुरू झाली

• एलपीजी सिलिंडर बुकिंग नवीन नियम

• भारत गॅस डिलिव्हरी पुन्हा सुरू

आखाती देशांमध्ये सुरू असलेल्या तणावादरम्यान आणि जागतिक अशांततेच्या पार्श्वभूमीवर एलपीजी गॅस सिलिंडरचा तुटवडा निर्माण झाला होता. अजूनही गॅस सिलिंडरची पुरवठा साखळी विस्कळीत आहे. अशामध्ये ग्राहकांसाठी आनंदाची बातमी आहे. भारत गॅसने एलपीजी सिलिंडरची घरपोच डिलिव्हरी पुन्हा सुरू केली आहे. त्यामुळे ग्राहकांना मोठा दिलासा मिळाला आहे.

आखाती देशांमध्ये युद्ध सुरू झाल्यानंतर विशेषत: ग्रामीण भागांमध्ये गॅसच्या तुटवड्यामुळे भारत गॅसने अनेक ठिकाणी घरपोस गॅस सिलिंडरची सुविधा थांबवली होती. आता ही सुविधा सुरू करण्यात आली आहे. भारत गॅस आधी एचपी गॅसने घरपोच गॅस सिलिंडर सुविधा उपलब्ध करून दिली. घरपोच गॅस सिलिंडर ही सेवा पुन्हा सुरू करण्यात आल्यामुळे ग्राहकांमध्ये आनंदाचे वातावरण आहे.

आखाती देशांमध्ये युद्ध सुरू झाल्यानंतर गॅस सिलिंडरच्या मागणीत अचानक मोठी वाढ झाली. नागरिकांनी घाबरून खरेदी करण्यास सुरूवात केली. त्यामुळे गॅस कंपन्यांनी अनेक भागांमध्ये घरपोच गॅस सिलिंडरचे वितरण बंद केले. आता अधिक कडक नियमांनुसार त्या भागांमध्ये एलपीजी सिलिंडरची घरपोच सुविधा पुन्हा सुरू करण्यात आली आहे.

काळाबाजार रोखण्यासाठी केंद्र सरकारने एलपीजी सिलिंडर बुक करण्याचे नियम अधिक कडक केले आहेत. आता ओटीपीशिवाय एलपीजी सिलिंडर मिळणार नाहीत. नवीन नियमांनुसार, तुम्हाला सर्वात आधी तुमच्या नोंदणीकृत मोबाईल नंबरचा वापर करून एलपीजी सिलेंडर बुक करावा लागेल.

त्यानंतर तुमच्या मोबाईल नंबरवर एक ओटीपी पाठवला जाईल. हा ओटीपी घेऊन तुम्ही डीलरकडे जाऊ शकता किंवा सिलेंडर घेऊन जाणाऱ्या वाहनाला तो ओटीपी दाखवू शकता. डीलर ओटीपीची पडताळणी करेल. त्यानंतरच तुम्हाला नवीन एलपीजी सिलेंडर मिळू शकेल. यासाठी तुमच्याकडे तुमचे गॅस पासबुक असणे आवश्यक आहे.