'धनुष्यबाण चिन्ह गोठवा, चोरांना देऊ नका'; एकनाथ शिंदेंना अडचणीत आणण्यासाठी उद्धव ठाकरेंची मागणी

शिवसेना पक्ष आणि चिन्हावरून सुप्रीम कोर्टात महत्त्वपूर्ण सुनावणी सुरू आहे. ठाकरेसेनेचां युक्तिवाद संपवल्यानंतर सध्या शिंदेसेनेकडूनही कोर्टात युक्तिवाद केला जातोय. मात्र, आता ठाकरेसेनेचे प्रमुख उद्धव ठाकरेंनी मोठं विधान केलंय. आधी धनुष्यबाणासाठी लढणाऱ्या उद्धव ठाकरेंनी आता थेट पक्षाचं धनुष्यबाण चिन्ह गोठवण्याची मागणी केलीये. आमचा पक्ष आणि चिन्हं चोरलं, त्यांना चोरीचा माल वापरू देऊ नका, असं म्हणत ठाकरेंनी शिंदेंवर निशाणा साधलाय. तर दुसरीकडे, आम्हीच उठाव करून 4 वर्षांपूर्वी धनुष्यबाण पुन्हा शिवसेनेच्या ताब्यात आणल्याचं सांगत शिंदेसेनेनं ठाकरेंवर पलटवार केलाय.

येत्या 15 सप्टेंबरला सुप्रीम कोर्टात शिंदेसेनेकडून पुन्हा युक्तिवाद केला जाणार आहे. शिंदेसेना नेमका काय युक्तिवाद करणार, याकडे सगळ्याचं लक्ष लागलंय. मात्र, संपूर्ण महाराष्ट्राच्या राजकारणात सर्वात लक्षवेधी ठरलेल्या शिवसेना पक्ष आणि चिन्ह खटल्यात उद्धव ठाकरेंनी अनपेक्षित भूमिका घेतल्यानं या खटल्याची उत्सुकता आणखी शिगेला पोहोचलीये.