Ladki Bahin Yojana September ₹1,500 Installment : ऑक्टोबर महिना अर्धा झाला, नवरात्री सुरू झाली पण अद्याप लाडक्या बहि‍णींच्या सप्टेंबरच्या हप्त्याबाबत कोणताही निर्णय घेण्यात आला नाही. सप्टेंबर महिन्याच्या अखेरीस लाडक्या बहि‍णींना ऑगस्ट महिन्याचा सन्मान निधी देण्यात आला होता. पण आता सप्टेंबरचा निधी कधी दिला जाणार? अशी चर्चा महिलांमध्ये सुरू झाली आहे. याबाबत महत्त्वाची अपडेट समोर आली आहे. आज होणाऱ्या मंत्रिमंडळाच्या बैठकीत लाडक्या बहि‍णींच्या निधीवर चर्चा होण्याची शक्यता वर्तवली जात आहे.

सप्टेंबर महिन्याचा १५०० रुपयांचा थकीत हप्ता चालू ऑक्टोबर महिन्यात कधी मिळणार आणि तो कसा वितरित केला जाणार, याकडे राज्यातील कोट्यवधी लाभार्थी महिलांचे लक्ष लागले आहे. आज पार पडणाऱ्या राज्य मंत्रिमंडळाच्या बैठकीत याबाबत अत्यंत महत्त्वाचा निर्णय होण्याची दाट शक्यता वर्तवली जात आहे. फक्त सप्टेंबर महिन्याचा हप्ता द्यायचा की सप्टेंबर आणि ऑक्टोबर या दोन महिन्याचे हप्ते दिवाळी एकत्र द्यायचे? याबाबत लवकरच निर्णय होऊ शकतो.

फक्त एकाच महिन्याचा म्हणजे सप्टेंबर महिन्याचा हप्ता जमा होणार असले तर तो दसऱ्यानंतर येण्याची शक्यता आहे. तर ऑक्टोबर आणि सप्टेंबर या दोन महिन्याचे ३ हजार रूपये दिवाळीत येणार असल्याची चर्चाही जोरदार सुरू आहे. लाडकी बहीण योजनेअंतर्गत आतापर्यंत जुलै आणि ऑगस्ट महिन्याचे हप्ते पात्र महिलांच्या बँक खात्यात थेट डीबीटी (DBT) द्वारे वर्ग करण्यात आले आहेत. राज्यात दुष्काळाची परिस्थिती आहे, त्यामुळेही हप्त्याला विलंब होत असल्याचे बोलले जात आहे.

दोन हप्ते एकत्र मिळणार?

दिवाळीच्या तोंडावर महिलांच्या हाताला आर्थिक हातभार लावण्यासाठी राज्य सरकार मोठा निर्णय घेण्याच्या तयारीत असल्याचे समजतेय. सूत्रांनी दिलेल्या माहितीनुसार, सप्टेंबर महिन्याचा थकीत हप्ता आणि ऑक्टोबर महिन्याचा नियमित हप्ता, असे एकूण ३००० रुपये एकत्र महिलांच्या खात्यात जमा करण्याबाबत प्रशासकीय पातळीवर हालचाली सुरू आहेत. आजच्या मंत्रिमंडळ बैठकीत या आर्थिक तरतुदीला आणि निधी वितरणाला मंजुरी मिळण्याची दाट शक्यता आहे.