लाडकी बहीण योजनेत जिल्हा परिषदेच्या सरकारी कर्मचाऱ्यांनी लाभ घेतल्याची धक्कादायक माहिती समोर आली आहे. बुलढाणा जिल्हा परिषद सेवेत असलेल्या 199 महिलांनी लाडकी बहीण योजनेचा लाभ घेतला आहे. सरकारी कर्मचारी असलेल्या लाडक्या बहि‍णींनी नियमाबाहेर जाऊन योजनेचा लाभ घेतला आहे. या योजनेतील महिलांनी सरकारचे लाखो रुपये लाटले आहेत.

बुलढाण्यात जिल्हा परिषदेच्या महिला कर्मचाऱ्यांनी घेतला योजनेचा लाभ

बुलढाणा जिल्हा परिषदेच्या १९९ महिलांनी योजनेअंतर्गत दर महिन्याला १५०० रुपये घेतले आहेत. याप्रकरणी या सर्व महिलांना अपात्र ठरवून त्यांच्यावर लवकरच कारवाई करण्यात येईल असा इशारा जिल्हा परिषदेचे उपमुख्य कार्यकारी अधिकारी आशिष पवार यांनी दिला आहे. त्यामुळे शासकीय सेवेतील या लाभार्थ्यांमध्ये खळबळ उडाली आहे.

नाशिकमध्ये सरकारी पुरुष कर्मचाऱ्यांनी घेतला लाडकी बहीण योजनेचा लाभ

नाशिक जिल्हा परिषदेतही लाडक्या बहीण योजनेत घोटाळा झाला आहे.योजनेचा गैरवापर करत तब्बल ८ कर्मचाऱ्यांनी लाभ घेतल्याचं उघड झाले आहे. धक्कादायक बाब म्हणजे म्हणजे लाभार्थ्यांमध्ये दोन पुरुष कर्मचाऱ्यांचाही समावेश आहे. बोगस लाभार्थ्यांकडून योजनेची रक्कम करण्यात वसूल येणार आहे.योजनेचा लाभ घेणाऱ्या कर्मचाऱ्यांवर शिस्तभंगाची कारवाई होण्याची शक्यता आहे.

आतापर्यंत लाडकी बहीण योजनेत सरकारी महिला कर्मचाऱ्यांनी लाभ घेतला आहे. परंतु आता पुरुष सरकारी कर्मचाऱ्यांनीही योजनेचा लाभ घेतला आहे. नाशिकमध्ये २ पुरुष कर्मचाऱ्यांनी योजनेचा लाभ घेतला आहे. या पुरुषांवर आता कारवाई केली जाणार आहे.

११८१ सरकारी महिलांवर होणार कारवाई

याआधीही लाडकी बहीण योजनेत हजारो जिल्हा परिषद कर्मचाऱ्यांनी लाभ घेतला आहे. जवळपास ११८१ कर्मचाऱ्यांनी या योजनेचा लाभ घेतला आहे. या महिलांवर कारवाई करण्याबाबत सूचना देण्यात आले आहे. या महिलांवर कार्यवाही करुन त्याचा अहवाल सादर करण्यास महिला व बालविकास विभागाने सांगितले आहे.या अपात्र महिला आणि पुरुषांचे लाभ बंद केले जाणार आहेत.