मार्च महिना संपत आला तरीही लाडक्या बहि‍णींना अजूनही फेब्रुवारीचा हप्ता मिळालेला नाही. लाभार्थी महिलांना पैसे न मिळाल्याने अनेक प्रश्न उपस्थित केले जात आहेत. महिलांना पैसे कधी येणार, याचसोबत आता फेब्रुवारी आणि मार्चचा हप्ता एकत्र येणार का असाही प्रश्न विचारला जात आहे. दरम्यान, राज्य सरकारने याबाबत एक महत्त्वाचा निर्णय घेतला आहे.

फेब्रुवारीचा हप्ता लवकरच मिळणार (Ladki Bahin Yojana February Installment Date)

लाडकी बहीण योजनेच्या लाभार्थ्यांना फेब्रुवारीचा हप्ता लवकरच मिळणार आहे. राज्य सरकारने १५०० रुपयांबाबत मोठा निर्णय घेतला आहे. आता फेब्रुवारीच्या हप्त्यासाठी निधी वितरित केला जात आहे. सामाजिक न्याय आणि विशेष सहाय्य विभागाने योजनेच्या हप्त्यासाठी २७७ कोटी रुपये वर्ग करण्यास मान्यता दिली आहे. हा निधी महिला व बाल विकास विभागाच्या अर्थसंकल्पीय निधीत वर्ग करण्यास शासन मान्यता मिळाली आहे. त्यामुळे काही दिवसात लाडक्या बहि‍णींच्या खात्यात फेब्रुवारीचा हप्ता जमा होण्याची शक्यता आहे.

कोणाला मिळणार लाभ? (Ladki Bahin Yojana February Installment Update)

मार्च महिना संपत आला तरीही पैसे न जमा झाल्याने महिलांच्या मनात संभ्रम निर्माण झाला आहे. याचसोबत पैसे कोणाला मिळणार असाही प्रश्न विचारला जात आहे. लाडकी बहीण योजनेचा हप्ता हा फक्त ज्या महिला निकषात बसतात त्यांनाच मिळणार आहे. याचसोबत ज्या महिलांनी केवायसी केली आहे त्यांनाच या योजनेचा लाभ मिळणार आहे. ज्यांच्या केवायसीमध्ये चुका झाल्या आहेत त्यांनी ३१ मार्चपर्यंत दुरुस्ती करायची आहे. अन्यथा त्यांचा लाभ कायमचा बंद केला जाईल.