रिलायन्सने त्यांच्या वार्षिक सर्वसाधारण सभेत जिओ फ्रेम्स या एआय पॉवर्ड स्मार्ट ग्लासेसची घोषणा केली आहे. हे स्मार्ट ग्लासेस थेट मेटा रेबॅनशी स्पर्धा करणार असून स्मार्ट वेअरेबल्सच्या बाजारात मोठी चुरस निर्माण करणार आहेत. अलीकडे लेन्सकार्टनेही स्मार्ट ग्लासेस सादर केले होते, मात्र त्यामध्ये कॅमेऱ्याची सुविधा नव्हती. दरम्यान, अमेरिकन टेक कंपनी मेटाने काही दिवसांपूर्वीच भारतात आपले रेबॅन स्मार्ट ग्लासेस लाँच केले असून, हे उत्पादन इतर देशांमध्ये काही वर्षांपूर्वीच उपलब्ध झाले होते.

जिओ फ्रेम्समध्ये इनबिल्ट ओपन इअर स्पीकर्स देण्यात आले आहेत, ज्याद्वारे यूजर्स थेट चष्म्यातून कॉल करू शकतात, कॉल स्वीकारू शकतात किंवा संगीताचा आनंद घेऊ शकतात. यामध्ये एचडी फोटो काढण्याची आणि व्हिडिओ रेकॉर्ड करून थेट सोशल मीडियावर शेअर करण्याची सुविधाही उपलब्ध आहे. रिलायन्सचे चेअरमन मुकेश अंबानी यांनी सांगितले की, जिओ फ्रेम्स स्मार्ट ग्लासेस मोबाईल अॅपशी जोडता येतात आणि त्यामध्ये साठवलेले फोटो व व्हिडिओ वापरकर्ते सहज पाहू शकतात.

जिओ फ्रेम्समध्ये जिओ व्हॉइस एआय नावाचा बिल्ट-इन व्हॉइस असिस्टंट आहे, जो वापरकर्त्यांच्या प्रश्नांना उत्तरे देतो. उदाहरणार्थ, तुम्ही स्वयंपाकघरात एखादी रेसिपी विचारली तर तो तुम्हाला पायरीपायरीने मार्गदर्शन करेल. त्याशिवाय या ग्लासेसमध्ये लाईव्ह ट्रान्सलेशनचीही सुविधा आहे. त्यामुळे विविध भारतीय भाषांचा सपोर्ट मिळेल आणि कोणतेही उत्पादन, मेनू किंवा चिन्ह पाहून त्याचे भाषांतर करता येईल.

कंपनीने जिओ फ्रेम्सच्या किमतीबाबत कोणतीही अधिकृत घोषणा केलेली नाही. सध्या भारतात मेटा रेबॅन स्मार्ट ग्लासेसची किंमत सुमारे ३५ हजार रुपयांपासून सुरू होते. त्यामुळे अशी अपेक्षा आहे की जिओ आपले ग्लासेस अधिक किफायतशीर दरात बाजारात आणेल. कॉलिंग, संगीत, फोटो-व्हिडिओसोबत एआय सपोर्ट आणि भाषांतर यांसारख्या आधुनिक फीचर्समुळे जिओ फ्रेम्स स्मार्ट ग्लासेस भारतीय बाजारात तंत्रज्ञानाच्या नव्या क्रांतीची सुरुवात करू शकतात.