Pixel 10 Series Sale: गुगल पिक्सेल १० सिरीजची विक्री सुरू; मिळणार १० हजार रुपयांची सूट, जाणून घ्या फीचर्स आणि किंमत

गुगलने आपल्या नवीन पिक्सेल १० सिरीजची विक्री आजपासून म्हणजेच २८ ऑगस्टपासून सुरू केली आहे. या महिन्याच्या सुरुवातीला कंपनीने पिक्सेल १०, पिक्सेल १० प्रो, पिक्सेल १० प्रो एक्सएल आणि पिक्सेल १० प्रो फोल्ड हे चार स्मार्टफोन लाँच केले होते. या सिरीजमध्ये विशेष म्हणजे, पिक्सेल १० मॉडेलमध्ये सर्वाधिक बदल करण्यात आले असून आता यात ट्रिपल रियर कॅमेरा सेटअप, मोठी बॅटरी आणि नवीन प्रोसेसर देण्यात आला आहे.

गुगल पिक्सेल फोनची किंमत किती?

गुगल पिक्सेल १० ची सुरुवातीची किंमत ७९,९९९ रुपये असून तो १२ जीबी रॅम आणि २५६ जीबी स्टोरेज या एकाच कॉन्फिगरेशनमध्ये उपलब्ध आहे. या फोनवर एचडीएफसी बँक कार्डधारकांना ७,००० रुपयांची त्वरित सूट मिळत आहे. पिक्सेल १० प्रोची किंमत १,०९,९९९ रुपये ठेवण्यात आली असून तो १६ जीबी रॅम आणि २५६ जीबी स्टोरेज व्हेरिएंटमध्ये येतो. यावर १०,००० रुपयांचा कॅशबॅक मिळतो.

त्याचप्रमाणे, पिक्सेल १० प्रो एक्सएलची किंमत १,२४,९९९ रुपये असून हा देखील १६ जीबी रॅम + २५६ जीबी स्टोरेज व्हेरिएंटमध्ये उपलब्ध आहे. या फोनवर देखील १०,००० रुपयांचा कॅशबॅक दिला जात आहे. ही ऑफर्स एचडीएफसी बँकेच्या क्रेडिट कार्डवर लागू आहेत. ग्राहक हे हँडसेट फ्लिपकार्ट, क्रोमा, विजय सेल्स आणि गुगल स्टोअरवरून खरेदी करू शकतात.

वैशिष्ट्ये काय आहेत?

नवीन पिक्सेल १० सिरीजमध्ये गुगलचा टेन्सर जी५ प्रोसेसर देण्यात आला आहे. पिक्सेल १० आणि १० प्रोमध्ये ६.३ इंचाचा एलटीपीओ ओएलईडी डिस्प्ले असून पिक्सेल १० प्रो एक्सएलमध्ये ६.८ इंचाचा डिस्प्ले आहे. कॅमेराच्या बाबतीत, पिक्सेल १० मध्ये ४८ मेगापिक्सेल + १३ मेगापिक्सेल + १०.८ मेगापिक्सेल ट्रिपल रियर कॅमेरा आणि १०.५ मेगापिक्सेल फ्रंट कॅमेरा आहे. प्रो व्हेरिएंटमध्ये ५० मेगापिक्सेल + ४८ मेगापिक्सेल + ४८ मेगापिक्सेल रियर कॅमेरा सेटअप तर ४२ मेगापिक्सेल फ्रंट कॅमेरा देण्यात आला आहे.

बॅटरी क्षमतेकडे पाहिले तर पिक्सेल १० मध्ये ४९७०mAh, पिक्सेल १० प्रोमध्ये ४८७०mAh तर पिक्सेल १० प्रो एक्सएलमध्ये ५२००mAh बॅटरी दिली आहे. सर्व मॉडेल्स अँड्रॉइड १६ ऑपरेटिंग सिस्टीमवर चालतात आणि यामध्ये वायरलेस मॅग्नेटिक चार्जिंगची सुविधा देखील उपलब्ध आहे.