Samsung Galaxy S25 FE स्पेसिफिकेशन्स आणि रंग पर्याय लीक, 'या' दिवशी होऊ शकतो लाँच

सॅमसंगच्या फॅन एडिशन मालिकेतला पुढचा स्मार्टफोन गॅलेक्सी एस२५ एफई लवकरच बाजारात येण्याची शक्यता आहे. या हँडसेटचे रेंडर्स आणि प्रमुख स्पेसिफिकेशन्स अलीकडेच समोर आले असून, यामुळे त्याच्या डिझाइन आणि फीचर्सची झलक मिळाली आहे. दक्षिण कोरियाच्या टेक कंपनीने अद्याप या फोनबद्दल अधिकृत घोषणा केलेली नसली तरी टिपस्टर्सनी त्याच्या डिझाइनपासून बॅटरी आणि कॅमेरापर्यंतची माहिती उघड केली आहे.

प्रसिद्ध टिपस्टर अहमद क्वाइडर यांनी सांगितले की गॅलेक्सी एस२५ एफई पाच रंग पर्यायांमध्ये उपलब्ध होऊ शकतो. यात नेव्ही, डार्क ब्लू, लाईट ब्लू, ब्लॅक आणि व्हाईट या शेड्स असतील. हँडसेटमध्ये ६.७-इंचाचा डायनॅमिक एमोलेड डिस्प्ले दिला जाईल, ज्यामध्ये १२० हर्ट्झ रिफ्रेश रेट आणि १,९०० निट्स पीक ब्राइटनेस असेल. डिस्प्ले आणि मागील पॅनेल दोन्हीकडे गोरिल्ला ग्लास व्हिक्टस+ प्रोटेक्शन मिळेल.

फोनमध्ये सॅमसंगचा एक्सिनोस २४०० प्रोसेसर दिला जाणार असून त्याला ४,९०० एमएएच क्षमतेची बॅटरी सपोर्ट करेल. ही बॅटरी ४५ वॅट फास्ट चार्जिंगसह येणार आहे. लीक झालेल्या माहितीनुसार, गॅलेक्सी एस२५ एफईला मागील मॉडेलपेक्षा १३ टक्के चांगला कूलिंग परफॉर्मन्स मिळेल. फोटोग्राफीसाठी, यात ट्रिपल रिअर कॅमेरा सेटअप असेल ज्यामध्ये ५० मेगापिक्सेलचा प्रायमरी सेन्सर, १२ मेगापिक्सेलचा अल्ट्रावाइड लेन्स आणि ८ मेगापिक्सेलचा टेलिफोटो सेन्सर ३x ऑप्टिकल झूमसह दिला जाईल. फ्रंट कॅमेरासाठी १२ मेगापिक्सेलचा शूटर दिला जाऊ शकतो.

हा स्मार्टफोन अँड्रॉइड १६-आधारित वन यूआय ८ वर चालेल आणि त्यात गॅलेक्सी एआयची सुविधा असेल. याशिवाय, आयपी६८ रेटिंगमुळे फोनला धूळ आणि पाण्यापासून संरक्षण मिळेल. तसेच वाय-फाय ६ई कनेक्टिव्हिटीचाही सपोर्ट दिला जाईल. मिळालेल्या माहितीनुसार, Samsung Galaxy S25 FE यावर्षी ४ सप्टेंबरला लाँच होऊ शकतो. किंमतीबाबत बोलायचे झाले तर हा हँडसेट युरोपियन बाजारात EUR ६७९ (सुमारे ₹६९,०००) पासून उपलब्ध होऊ शकतो.