खासगी क्षेत्रातील नामांकित आयसीआयसी बँक ग्राहकांना एकामागून एक धक्के देत आहे. आधी बँकेनं खात्यात किमान शिल्लक रक्कम १० हजारवरून ५० हजार रूपये केले. दरम्यान, आता बँकेनं खात्यातून पैसे काढणे, जमा करणे, एटीएममधून पैसे काढणे यांसारख्या सर्व सेवांवरील शुल्क वाढवले आहेत. बँकेच्या नवीन आदेशानुसार, जर आपले आयसीआयसीआय बँकेत खाते असेल आणि स्वत:च्या बँक खात्यात पैसे काढले किंवा जमा केले तरी तुम्हाला पूर्वीपेक्षा अधिक शुल्क भरावे लागेल.

आयसीआयसीआय बँकेनं शुल्क वाढवले

बँकेनं त्यांच्या नवीन सेव्हिंग खातेधारकांसाठी सेवा शुल्क वाढवले आहेत. नव्या नियमानुसार, जर तुम्ही एटीएममधून पैसे काढले किंवा खात्यात जमा केले तर, तुम्हाला अतिरिक्त शुल्क भरावे लागेल. इकॉनॉमिक टाईम्समधील प्रकाशित झालेल्या वृत्तानुसार, बँकेच्या शाखेत जाऊन किंवा कॅश रिसायकलर मशीनद्वारे पैसे जमा करण्यासाठी किंवा काढण्यासाठी नवीन शुल्क निश्चित केले आहेत.

नवीन नियमानुसार, दर महिन्याला तीन व्यवहारानंतर प्रत्येक व्यवहारावर १५० रूपये शुल्क आकारले जाईल. १ लाखाहून अधिक रूपयांचा व्यवहार केल्यास १ हजार किंवा १५० जे अधिक असेल शुल्क भरावं लागेल. याशिवाय बँकेनं सेव्हिंग अकाऊंटसाठी थर्ड पार्टी विथड्राव्हल लिमिट २५ हजारपर्यंत केली आहे.

एटीएम व्यवहारांवरही शुल्क वाढवले

आयसीआयसीआय बँकेनं आता एटीएममधून पैसे काढणे, बॅलन्स चेक करणे, पिन जनरेट करणे, इतर एटीएमच्या निगडीत कामांवर शुल्क वाढवले आहेत. प्रत्येक आर्थिक व्यवहारावर २३ रूपये शुल्क आकारले जाईल. तसेच बँक बॅलेन्स चेक करण्यासाठी ८.५ रूपये आकारले जातील.