प्रत्येकाचे काही न काही स्वप्न असते. आपले स्वप्न पूर्ण करण्यासाठी दिवसरात्र मेहनत करावी लागते. अनेकदा आपल्याला चांगल्या पगाराची नोकरीदेखील मिळते मात्र, आपले स्वप्न अर्धवट राहिल्याची खंत कुठेतरी मनात असते. असंच काहीसं आदित्य श्रीवात्सव यांच्यासोबत घडलं आणि त्यांनी आपले स्वप्न पूर्ण केले. त्यांनी आयएएस होण्याचे स्वप्न पूर्ण करण्यासाठी ४० लाखांची नोकरीदेखील सोडली होती. त्याचा हा प्रवास सर्वांसाठीच प्रेरणादायी आहे.

आदित्य श्रीवास्तव हे लखनऊचे रहिवासी. ते लहानपणापासूनच अभ्यासात खूप हुशार होते. त्यांनी सुरुवातीचे शिक्षण लखनऊमधील सीएमएस स्कूल अलीगंज येथून घेतले. त्यांना दहावीच्या परीक्षेत ९७.८ टक्के गुण मिळाले. १२वीच्या परीक्षेत ९७.५ टक्के गुण मिळवले आहेत.

IIT-JEE मध्ये चांगले गुण

शालेय शिक्षण झाल्यानंतर त्यांनी इंजिनियरिंगचे शिक्षण घेतले. त्यांनी जेईई मेन्स परीक्षा दिली. ही देशातील सर्वात अवघड परीक्षांपैकी एक आहे. यानंतर त्यांनी जेईई अॅडव्हान्स परीक्षादेखील पास केली.यानंतर त्यांनी आयआयटी कानपूरमध्ये अॅडमिशन घेतले. त्यांनी इलेक्ट्रिकल इंजिनियरिंगमध्ये बीटेक आणि नंतर एमटेक केले.

आयआयटी कानपुरमध्ये शिक्षण पूर्ण झाल्यानंतर त्यांना चांगल्या मल्टीनॅशनल कंपनीत नोकरी मिळाली. मात्र,त्यांच्या वडिलांचे मुलाने सिविल सर्व्हिसमध्ये जावे, असं स्वप्न होते. त्यांचे वडील सेंट्रल ऑडिट डिपार्टमेंटमध्ये एएओ पदावर कार्यरत होते.

आदित्य यांनी यूपीएससी परीक्षेसाठी ४० लाखांच्या पगाराची नोकरी सोडली. ते २०२१ मध्ये प्रीलियम्स परीक्षेत अपयश मिळाले तरीही त्यांनी हार मानली नाही. २०२२ मध्ये त्यांनी २३६ रँक मिळवली. तेव्हा आयपीएस झाले. त्यानंतर त्यांनी २०२३ मध्ये पुन्हा परीक्षा दिली आणि त्यांनी ऑल इंडिया रँक १ प्राप्त केली.