आजकाल आपण लहान-मोठ्या खर्चासाठी UPI वापरत आहोत. PhonePe, Google Pay आणि BHIM यासारख्या ॲप्सचा वापर करतो. यामुळे पैशांची देवाणघेवाण सोपी आणि जलद झाली आहे. मात्र कधीतरी घाईगडबडीत आणि एका छोट्या चुकीमुळे पैसे चुकीच्या खात्यात जातात. अशावेळी घाबरून न जाता आणि टेन्शन न घेता, तक्रार करा. तुमचे पैसे तुम्हाला मिळतील.

तुमचे पैसे जर चुकीच्या बँक खात्यात गेले असेल तर तुम्ही ताबडतोब NPCI पोर्टलवर तक्रार दाखल करू शकता. तुम्ही तुमच्या बँकेद्वारे किंवा हेल्पलाइन नंबरद्वारे देखील मदत घेऊ शकता. तक्रार केल्यानंतर ४८ तासांच्या आत कारवाई सुरू केली जाते, ज्यामुळे तुमचे पैसे परत मिळण्याची शक्यता वाढते. सर्वात आधी बँकेशी संपर्क साधा आणि व्यवहाराचे योग्य तपशील घ्या. त्यानंतर त्वरित तक्रार दाखल करा. मात्र कायम लक्षात ठेवा की, पैसे पाठवण्यापूर्वी UPI आयडी किंवा मोबाईल नंबर पुन्हा तपासा.

NPCI पोर्टलवर तक्रार कशी करावी?

तुम्ही नॅशनल पेमेंट्स कॉर्पोरेशन ऑफ इंडियाच्या वेबसाइटवर चुकीच्या व्यवहाराबद्दल तक्रार दाखल करू शकता.

• पायरी १- सर्वप्रथम https://www.npci.org.in/ उघडा.

• पायरी २- UPI Dispute / Complaint (यूपीआय विवाद / तक्रार) या पर्यायावर क्लिक करा.

• पायरी ३ - यानंतर, तुमचा यूपीआय संदर्भ क्रमांक (UPI Reference Number) आणि व्यवहाराचा तपशील (transaction details) टाका.

• पायरी ४- त्यानंतर तुमचा मोबाईल नंबर टाका. शेवटी, तक्रार सबमिट करा.

हेल्पलाइन नंबरवर तक्रार दाखल करा

तुम्ही हेल्पलाइन नंबरच्या मदतीने देखील तक्रार दाखल करू शकता. यूपीआय-संबंधित समस्यांसाठी, तुम्ही 1800-120-1740 या क्रमांकावर कॉल करून तक्रार दाखल करू शकता. हा क्रमांक टोल-फ्री आहे.जेव्हाही तुम्ही डिजिटल पेमेंट करता, तेव्हा त्याच्याशी संबंधित एसएमएस आणि व्यवहाराचा तपशील जपून ठेवा. जर काही समस्या उद्भवली, तर तक्रार दाखल करताना आणि तपासाच्या वेळी ही माहिती उपयुक्त ठरेल.