संजय महाजन, साम टीव्ही

जळगाव: इराण-इस्रायल-अमेरिका युद्धाची तीव्रता कमी होण्याची चिन्हे दिसू लागताच जळगावमध्ये सोने आणि चांदीच्या दरात मोठी वाढ झाल्याचं पाहायला मिळत आहे. आंतरराष्ट्रीय परिस्थितीत स्थिरता येण्याची शक्यता निर्माण होताच गुंतवणूकदारांचा कल पुन्हा मौल्यवान धातूंकडे वळल्याचं चित्र आहे. काल जीएसटीशिवाय १,४०,५०० रुपयांवर असलेले सोन्याचे दर आज तब्बल ५ हजार रुपयांनी वाढून १,४५,५०० रुपयांवर पोहोचले आहेत. त्याचप्रमाणे चांदीच्या दरातही मोठी वाढ झाली असून २,२०,००० रुपयांवरून ती थेट २,४०,००० रुपयांवर गेली आहे.

दरम्यान, आंतरराष्ट्रीय पातळीवर पूर्णपणे युद्धविराम झाला तर सोन्याचे दर पुन्हा स्थिर होण्याची शक्यता सुवर्ण व्यावसायिकांनी व्यक्त केली आहे. मात्र, परिस्थिती पुन्हा तणावपूर्ण झाली तर सोने-चांदीच्या दरात पुन्हा चढ-उतार होण्याची शक्यता नाकारता येत नाही. सध्या बाजारातील अस्थिरतेमुळे गुंतवणूकदार सावध पवित्रा घेत असून पुढील घडामोडींवर सर्वांचे लक्ष लागले आहे.

युद्धजन्य परिस्थितिमुळे देशभरात गॅस, इंधनाचा तुटवडा निर्माण झाल्याने हॉटेल आणि खानावळ व्यावसायिकांची अडचण निर्माण अली असून महाविद्यालयीन विद्यार्थि, कामगार वर्ग यांनी गावाची वाट पकडली आहे. तसेच पंतप्रधान नरेंद्र मोदी यांनी देखील कोरोनासारखी परिस्थिति निर्माण होऊ शकते असा इशारा दिला आहे. अशातच सोन्याचे दर देखील वर खाली होत असल्याने ग्राहकांमध्ये संभ्रम निर्माण होत चालला आहे.